Ingingo 4 zizatuma igikombe cy'Isi cya 2026 gihangwa amaso cyane

Iki gikombe cy'Isi kizabera mu majyaruguru y'Amerika mu mwaka utaha hagati ya tariki 11 Kamena kugeza ku wa 19 Nyakanga. 

Dore ingingo 4 zizatuma iri rushanwa rigiye kuba ku nshuro ya 23 kuva mu 1930, rihangwa amaso cyane. 

1.Isezera rya Cristiano na Messi 

Mu 2026, kapiteni w'ikipe y'igihugu ya Portugal, Cristiano Ronaldo azaba afite imyaka 41 mu gihe yagikina we na mugenzi we Lionel Messi bahanganye igihe kirekire, ntagushidikanya ko cyaba ari cyo cya nyuma baba bakinnye bityo Isi yose ikazaba ibahanze amaso.

2.Ubwitabire bw'ibihugu byinshi 

Kuri iyi nshuro ni bwo bwa mbere igikombe cy'Isi kizakinwa n'ibihugu 48, ibizatuma hagira n'ibihugu byinshi byitabira ku nshuro ya mbere nka Cape Verde yatunguye Isi yose ibona itike.

Ifoto/internet: Stade ya MetLife izakira umukino wa nyuma 

3.Umuco n'indimi 

Ibihugu bitatu bizakira iri rushanwa ari byo; Amerika, Canada na Mexico, bikoreshwamo indimi eshatu zivugwa n'abenshi ku Isi (Icyesipanyoro, Icyongereza n'Igifaransa). Ibi bihugu kandi bihuriye ku korohereza ababirimo mu bijyanye n'imico itandukanye bitari nk'uko byari bimeze muri 2022 muri Qatar. 

4.Itangazamakuru rya Amerika 

Leta Zunze Ubumwe za Amerika nk'igihugu kimwe mu bizakira irushanwa, kizwiho kugira itangazamakuru rigera kure ndetse kikamenya kumenyekanisha ibyo gikora ariko kandi iki gihugu gifatwa nk'icya mbere ku Isi mu ngingo nyinshi zitandukanye, kiba gihanzwe amaso iteka.

Ariko kandi hari impungenge ku bijyanye no kwitabira imikino y'iri rushanwa cyane ku Banyafurika n'abandi bakomoka ku migabane nka Aziya, kuko kwinjira muri ibi bihugu byo mu majyaruguru y'Amerika bigisa n'ibigoye.