Indirimbo "Wait" ya Kivumbi King yakoze amateka yagirwaga na Meddy, Bruce Melodie na Element gusa

Iyi ndirimbo yagiye hanze mu ntangiriro za 2024, yakoze amateka yari afitwe n'indirimbo nke mu Rwanda, nka "Slowly", ya Meddy, "Lose Control" ari kumwe na The Ben, na "Fou De Toi" ya Element EleéeH, Rosskana na Bruce Melodie.

Kuri ubu iyi ndirimbo ya Kivumbi King, imaze kurebwa n'abarenga miliyoni 9.2 kuri YouTube, mu gihe imaze kumvwa inshuro miliyoni 1.3 kuri Audiomack, naho kuri Spotify ikaba imaze kumvwa inshuro miliyoni 1 irangaho gato.

Izindi ndirimbo z'abahanzi nyarwanda zabashije kugera kuri aka gahigo ni "Slowly" ya Meddy, imaze kurebwa n'abarenga miliyoni 125 kuri YouTube, yumviswe inshuro zirenga miliyoni 5 kuri Audiomack, mu gihe kuri Spotify yumviswe inshuro zigera kuri miliyoni 11.

Fou De Toi yaje mu ndirimbo 50 zakunzwe cyane ku Isi ku rubuga rwa Audiomack mu 2023, imaze kumvwa inshuro zigera miliyoni 3.3 kuri uru rubuga, naho kuri YouTube ikaba imaze kurebwa n'abarenga miliyoni 28, mu gihe kuri Spotify imaze kumvwa inshuro zigera kuri miliyoni 3.5.

Imibare nk'iyi kandi ifitwe n'indirimbo nka "Katerina" ya Bruce Melodie na "Lose Control" ya Meddy na The Ben, kuko nazo zarengeje miliyoni kuri izi mbuga zose. Meddy na Bruce Melodie bafite agahigo ko kuba ari bo bafite indirimbo batakoranye n'undi muhanzi, yagejeje miliyoni kuri YouTube, Audiomack na Spotify.

Wait ya Kivumbi King yakoranye na Axon