Indi ndege yo mu Buhinde yakoze impanuka
Nyuma y'impanuka ikomeye yahitanye abagera kuri 241, indi ndege yo mu Buhinde yakoreye impanuka mu karere kitwa Churu.
Ni indege y'igisikare cy'U Buhinde yari mu myitozo mu Karere ka Churu, mu Buhinde, ikora impanuka ikomeye ihita yivugana abari bayitwaye babiri.
Mu itangazo ryatanzwe n'Ingabo zirwanira mu kirere z' U Buhinde bemeje ayo makuru, bahamya ko ibyo byabaye ku mugoroba wo ku wa Gatatu w'iki cyumweru.
Bagize bati:"Indege yacu yari muri gahunda z'imyitozo yakoreye impanuka mu Karere ka Churu. Abari bayitwaye (pilots) babiri bakomeretse bikomeye bibambura ubuzima. Nta muturage uratumenyesha ko hari ibye byangijwe na yo kuko yaguye mu gisambu."
Bakomeje bafata mu mugongo imiryango yabuze abayo. Bati:"Twihanganishije imiryango yabuze abayo ndetse turi kumwe muri iki gihe cy'agahinda."
Bakomeje bavuga ko abari bayitwaye bagerageje kurwana na yo igwa ahadatuwe kugira ngo itangiza inyubako. Ikindi kandi iperereza rirakomeje ngo hamenyekane icyateye iyo mpanuka.
Uretse iyabaye muri Kamena 2025 igahitana abagera kuri 241, iyo ije ikurikira izindi mpanuka z' indege za gisirikare zabereye mu Buhinde.
Muri Mata 2025, indege nto ya gisikare yakoreye impanuka ku kibuga cy'indege cya Jamnagar umwe yitaba Imana undi ararokoka.
Muri Werurwe 2025, indi ndege nto y'icyo gisikare yakoreye impanuka mu Karere ka Panchkula ho mu gace ka Haryana. Uwari uyitwaye yagerageje kuyihungisha inzu igwa kure yazo.
What's Your Reaction?
