Imyidagaduro

Impamvu Big Fizzo yise album ye '777'

Umuhanzi wo mu gihugu cy' U Burundi, Big Fizzo yamaze kwemeza ko ku wa 15 Ugushyingo 2024 azashyira hanze umuzingo w'indirimbo (album) yise '777,’ ni umuzingo ufite umuzi mu kuvuka n'amateka ye.

Niyonkuru Augustin

Nov 13, 2024 - 14:33

Nov 13, 2024 - 15:58

Mugani Desire uzwi na benshi bihebeye umuziki nka Big Fizzo cyangwa se Big Farious ageze kure imyiteguro yo gushyira hanze album ya gatanu yise '777,' iriho indirimbo "Umudodo" yakoranye na Harmonize. Yayise gutyo kubera ko umubare karindwi ugaruka cyane mu itariki y'amavuko ye.

Mu kiganiro yagiranye na Igisubizo.com yahishuriyemo ko album ye yayise '777' kubera ko umubare karindwi ari umubare yubaha ndetse kugaragara no mu itariki yavukiyeho.

Yagize ati:"Ni album nitondeye cyane; nitondeye uko nayise ndetse n'indirimbo ziyiriho. Nayise '777' kubera ko navutse ku wa 25 Nyakanga (07) 1978 mvukira mu Bwiza mu mujyi wa Bujumbura. Urabona ko ari itariki igarukamo 7. Dore ukuntu yiganjemo 7: ufashe (tariki; 25) 2 ugateranyaho 5 urabona 7. Uje mu kwezi naho ni 7 (ni mu kwezi kwa Karindwi,7). Ugeze ku mwaka 1978: ufashe imibare y'inyuma 78; 7 ukongeraho 8 urabona 25. Umaze kubona 25, urafata 2 wongereho 5 uhite ubona 7. Ku bw'ibyo rero, nahise nyita 777."

"Mu ncamake, nzirikana umubare karindwi kuko ari umubare w'amahirwe kuri njye. Ibumbatiye kandi amateka yanjye; ibyo naciyemo n'ibyo nabonye."

Iyi album ya Big Fizzo igizwe n'indirimbo 14 zirimo izimaze iminsi zikunzwe nka Superman, Maria na Baridi. Iriho kandi iyitwa 'Umudodo Remix' yakoranye na Harmonize cyangwa se Konde Boy n'indi ndirimbo yitwa 'Niwe Nshaka' yakoranye na Melanin Boy.

Avuga ko ari album ye ya gatanu ije isobanura byinshi ku rugendo rwe rw' umuziki. Yatangiriye umuziki mu itsinda 'Nigga Soul' nyuma mu mwaka wa 2001 atangira kwikorana ku giti cye.

Yashyize hanze album ye ya mbere mu mwaka wa 2009 iyo album yayise 'Jewe.' Iya kabiri yayise 'Fizzology' akaba yarayishyize hanze mu mwaka wa 2017. Iya gatatu n'iya kane yazishyize hanze mu mwaka wa 2020 imwe yayise 'Desideratus' indi ayita 'Legendary.'

Big Fizzo ni umwe mu bahanzi bakomeye mu gihugu cy’U Burundi, dore ko atigeze yihererana ibyo yagezeho kuko mu mwaka wa 2017 yashinze inzu y'umuziki (studio) ayita 'Bantu Bwoy.' Ni inzu yazamuye abahanzi bakomeye barimo Kirikou Akili, Double Jay (Bilimani Boy), na Drama T.