Kwaka no gutanga imbabazi imwe mu nkingi y’ubwenge n’ubumuntu

Abanyabwenge batandukanye bagaragaje ko imbabazi atari ukwibagirwa icyaha umuntu yagukoreye cyangwa kucyemera nk’aho nta cyo ari cyo, ahubwo ni uguhitamo kutaremererwa nacyo. Mu mitekerereze y’inyigisho zitandukanye, imbabazi zifatwa nk’intambwe yo kwiyubaka no kwiyunga n’abandi.

Nk’uko byigishijwe na Mahatma Gandhi, yavuze ko umunyantege nke atabasha gutanga imbabazi, ko imbabazi ari umuco w’umunyembaraga. Ibi bigaragaza ko imbabazi zisaba umutima uhamye n’ubwenge buzi kureba kure.

Gutangira urugendo rwo gutanga imbabazi bisaba kwisuzuma, kwemera ko twababaye, no gufata icyemezo cyo kudakomeza kubaho turi imfungwa z’agahinda. Ni inzira igana ku bwisanzure bw’imbere mu mutima, aho umuntu yibohora akareka umutwaro w’inzika. Bityo, imbabazi ziba igikorwa cy’ubwenge burambye, butuma umuntu akura mu mitekerereze no mu mibanire n’abandi.

Imbabazi ni umuti w’umutima; zivanaho uburemere bw’inzika zigashyira amahoro mu mutima.

Umunyembaraga si uwihorera, ahubwo ni uwemera kurekura umujinya.

Imbabazi ni urufunguzo rufungura imiryango y’amahoro.

Kudatanga imbabazi ni nko kunywa uburozi wizeye ko buzangiza undi.

Iyo ubabariye, uba ubohoye umutima wawe mbere yo kubohora uwo ubabariye.

Imbabazi ntizisiba amateka, ariko zihana inzika.

Uwiga gutanga imbabazi aba yubatse urwego rwo hejuru rw’ubwenge.

Amahoro atangirira mu mutima mugihe wemeye kurekura inzika.

Imbabazi ni urugendo, si igikorwa cy’umunota umwe.

Gutanga imbabazi ni urugendo rutaba rworoshye ariko rufite inyungu zirambye. Ni igikorwa cyo kwiyubaha no kubaha undi, n’iyo yaba yarakoze amakosa akomeye. Imbabazi zifungura umutima, zigahosha umujinya, zigatuma habaho amahoro arambye haba mu muntu ku giti cye, mu muryango no mu muryango mugari w’abantu.

Iyo dutanze imbabazi, ntituba turimo gusiba amateka cyangwa gupfobya ibikomere; ahubwo tuba duhitamo ko ayo mateka atazakomeza kudutegeka. Tuba duhitamo amahoro aho guhitamo inzika. Ibyo ni byo byerekana ubwenge nyabwo, ubushobozi bwo kurenga ibidutandukanya tugaharanira ibiduhuza.

Bityo rero, imbabazi ni inkingi y’ubwiyunge, ni isoko y’ituze ry’umutima, kandi ni ikimenyetso cy’ubwenge n’imbaraga z’umuntu. Iyo tuyobotse inzira y’imbabazi, twubaka ejo hazaza huzuye icyizere, urukundo n’amahoro haba kuri twe ubwacu no ku bandi.

Philemon Burgin