Ijambo rya Barack Obama ku munsi wahariwe Martin Luther King Jr.
Kuri uyu wa 20 Mutarama 2025 abiganjemo Abanyamerika bongeye kwizihiza umunsi wahariwe impirimbanyi y’uburenganzira bw’abirabura muri Amerika, Martin Luther King Jr, uwahoze ari Perezida w’Amerika, Barack Obama agenera ubutumwa abamuzirikanye.
Umunsi wahariwe Dr. Martin Luther King Jr. muri Amerika wizihijwe kuri uyu wa 20 Mutarama 2025, Barack Obama aboneraho umwanya wo kuvuga ibigwi iyo ntwara yaharaniye ukwishyira ukwizana kw’abirabura muri Amerika.
Martin Luther King Jr wavutse ku wa 15 Mutarama 1929 akitaba Imana ku wa 04 Mata 1968, yashyiriweho umunsi wo kumuzirikana, hasubizwa amaso inyuma ngo harebwe imirimo yakoze. Umunsi we wemejwe n’uwari Perezida w’Amerika Ronald Reagan ku wa 02 Ugushyingo 1983, ahamya ko buri wa Mbere wa gatatu wa Mutarama hazajya hizihizwa umunsi we.
Kuri uyu munsi Abanyamerika bazindutse bamuzirikana maze Barack Obama akangurira abantu kumenya isomo yasize.
Yagize ati:”Dr. Martin Luther King Jr. yacanye mu bibazo ikinyabupfura, ukwihangana no kwizera, bifasha iki gihugu gutera imbere. Mu gihe duha icyubahiro ibigwi bye, uyu munsi, mureke twibuke isomo yatwigishije ko no mu bibazo, abaturage bakunda iki gihugu bagihindura.”
“Mu cyubahiro cy’uyu munsi wamuhariwe, reka nizere ko mu muryango mugari wanyu muzakora uko mushoboye mugahanga ejo hazaza heza hacu twese.”
Umunsi w’uyu mwaka wahuriranye n’umunsi w’amateka muri Amerika w’irahira rya Perezida w’icyo gihugu, Donald Trump.
Martin Luther King Jr. afatwa nk'impirimbanyi yo guharanira uburenganzira bw'abirabura muri Amerika
Martin Luther King Jr yahariwe umunsi we wa Mbere wa gatatu wa Mutarama
Barack Obama yahamagariye abantu kuzirikana ubutwari bwaranze Martin Luther King Jr.
What's Your Reaction?
