Icyo wamenya ku bihembo bya AFRIMA bihatanyemo Bruce Melodie na Diamond Platnumz

Mu ijoro ryo ku wa Gatatu nibwo byamenyekanye ko hashyizwe hanze abahataniye ibihembo bizwi nka 'AFRIMA'  bizongera gutangwa mu mpera z'uyu mwaka wa 2025. Abahanzi nyarwanda babihataniye ni Bruce Melodie na Element Eleeeh.

Abo bahataniye igihembo cy'umuhanzi mwiza w'umugabo wo mu Karere k'Afurika y'i Burasirazuba aho bahanganye n'abandi bahanzi nka Diamond Platnumz, Jux na Sat-B wo mu gihugu cy'U Burundi.

Ese ni ayahe mateka y'ibi bihembo?

AFRIMA yatangijwe mu mwaka wa 2014 na komite mpuzamahanga ku bufatanye n’Umuryango w'Afurika Yunze Ubumwe (AU), igamije guha ishimwe abahanzi abakorana na bo, guteza imbere ubuhanzi, udushya mu muziki wa Afurika, no guteza imbere umuco nyafurika.

AP yagarutse kuri ibyo bihembo yandika ko bifite intego yo guhuza impano z’abahanzi b’Afurika no guteza imbere ubuhanzi bwabo ku rwego mpuzamahanga; kubafasha kugera ku isoko ryagutse ryo muri Afurika no ku isi; no guteza imbere ubukerarugendo n’imico y’Afurika

Muri uwo mwaka wa 2014, byatangiwe i Lagos, Nigeria, ari naho hakiriye ibirori byakurikiyeho mu myaka itatu yakurikiyeho (2015 - 2017).

Nyuma byahinduye aho byatangiwe bijyanwa mu bindi bihugu byo hafi ya Nigeria

Kuva mu mwaka wa 2018 kugeza mu mwaka wa 2020, AFRIMA yatangiwe mu gihugu cya Ghana. Ariko muri Nyakanga 2019, ubwo Ghana yanze kuzuza inshingano zigenderwaho mu kubyakira,yarabyambuwe.

Mu mwaka wa 2020, ibyo birori ntabwo byabaye kubera icyorezo cya COVID-19 cyari cyirimo kuyogoza Isi. Mu mwaka wa 2021, ibirori byagarutse mu buryo busanzwe bibera i Lagos, Nigeria.

Mu mwaka wa 2023, AFRIMA yabereye i Dakar, Senegal, ari nabwo bwa mbere byabereye mu gihugu kivuga Igifaransa, ariko byazamuye imyumvire itandukanye ku muco w’Afurika.

Ibirori by’uyu mwaka wa 2025, bizabera aho byatangiriye mu mwaka wa 2014, i Lagos mu gihugu cya Nigeria.