Icyo umutoza wa Arsenal, Arteta yavuze nyuma yo gukerereza Liverpool
Ikipe ya Arsenal y'i London mu Bwongereza yanganyije n'indi kipe y'i London, Crystal Palace ibitego 2-2 bituma Liverpool ikomeza gutegereza igikombe. Arteta avuga ko babuze guhozaho.
Arsenal yongeye igaruka mu kibuga ikina umukino wa shampiyona y'Abongereza aho yacakiranye na Crystal Palace, ihirwa n'iminota ya mbere y'umukino ariko barayishyura bituma umukino urangira ari ibitego 2-2. Ni ibintu byababaje umutoza wa Arsenal n'ikipe ya Liverpool.
Nk' uko bigaragara muri iyi myaka, shampiyona y'Abongereza iyo iri kugana ku musozo ihorana ikubana hagati y'amakipe abiri. Imwe ishaka kwambura igikombe indi.
Muri uyu mwaka w'imikino 2024/25, ikipe ya Arsenal yakubanye ndetse ikomeje gukubana na Liverpool. Arsenal yakinnye na Crystal Palace imibare ivuga ko nitsindwa Liverpool ihita yishimira ko yatwaye igikombe nubwo shampiyona itararangira.
Umukino warangiye ari ibitego 2-2, Arsenal iguma ku mwanya wa kabiri n'amanota 67 naho Liverpool iguma iyoboranye amanota 79.
Ibyo byatumye Liverpool isubiza amerwe mu isaho biyisaba gutegereza umukino izakina na Tottenham mu mpera z' iki cyumweru.
Kuba Arsenal yari iyoboye umukino nyuma bakaza kuyishyura umukino ukarangira inganyije byababaje cyane, umutoza Mikel Arteta wari wizeye ko batahana amanota atatu.
Mu kiganiro na NBC Sports yagize ati:"Tubabajwe n'amanota dukuye kuri uyu mukino n'uburyo twitwaye. Ntabwo twigeze duhozaho uko bikwiye mu mukino."
"Ariki ni kimwe mu bigize umupira w'amaguru, kwitwara nabi bidutwaye amanota abiri. Uyu munsi twakabaye twitwaye neza ariko dukwiye gukora ibyiza kurushaho."
Nubwo bimeze bityo muri shampiyona, Arsenal yageze muri 1/2 cya EUFA Champions League, ku wa Kabiri utaha izakina na Paris Saint Germain.
What's Your Reaction?
