Icyo itsinda Vestine na Dorcas ryatangaje nyuma yo yishyingiranwa kwa Vestine na Idrissa

Ku mugoroba wo ku wa Gatatu, tariki ya 15 Mutarama 2025, abakoresha imbuga nkoranyambaga batunguwe no kubona inkuru yuko Ishimwe Vestine wo mu itsinda ry'abaramyi b'abavandimwe "Vestine na Dorcas" yasezeranye mu murenge n'umusore yihebeye wo mu gihugu cya Burkina Faso, Ouedraoso Idrissa, bamwe banze kubyemera ariko byarangiye na ba nyiri ubwite babyemeje ndetse hahishurwa imbamutima zabo zumvikanyemo gushimira Imana yamuhaye umugabo mwiza.

 Nyuma yo gutangazwa kuri uwo mugoroba, mugitondo cyo ku wa Kane, tariki ya 16 Mutarama 2025 haramutse inkuru zivuguruza ibyavuzwe ku mugoroba bamwe mu bakomeye ku mbuga nkoranyambaga mu Rwanda bavuga ko ari igihuha, Vestine atigeze asezerana mu mategeko.

 Ukuri kwahamijwe n'amashusho ndetse n'icyangobwa cyemeza ko basezeraniye mu Murenge wa Kinyinya mu Karere ka Gasabo mu Mujyi wa Kigali ku wa 15 Mutarama 2025, byasakajwe ku mbuga nkoranyambaga ku mugoroba wo ku wa 16 Mutarama 2025.

 Bamaze kubona ko ntacyo bakiramira bitakiri ibanga, bahise banyarukira ku mbuga nkoranyambaga basangiza abazikoresha amashusho yafashwe basezeraniye imbere y'amategeko.

Bahise bagira bati:"Imana ni yo nkuru igihe cyose. Mukomereze aho Vestine na Idrissa, tubifurije guhorana n'Imana ishobora byose."

 "Biragora kubona umugore mwiza, kubera ko aba afite agaciro kurenza amabuye ya zahabu."

Abo bakobwa bari bamaze imyaka hafi itanu bakorana nk'itsinda ririmba indirimbo zo kuramya no guhimbaza Imana. Ku wa 24 Ukuboza 2022 bakoze igitaramo cyo kumurika album yabo ya mbere bise "Nahawe Ijambo." Mu mwaka wakurikiyeho wa 2023 bagiye gutaramira mu gihugu cy' U Burundi. Abantu baribaza niba bazakomeza gukora umuziki.

  Hagati aho, bari mu myiteguro yo gushyira hanze indirimbo nshya bise "Yebo." Ni indirimbo bavuga ko iri mu rurimi rw' Ikizulu, Igiswahili n'Icyongereza.

Vestine n'umugabo we, Idrissa basezeranye imbere y'amategeko

Icyemezo cy'uko basezeranye imbere y'amategeko mu Murenge wa Kinyinya mu Karere ka Gasabo