Icyatumye Modric yihanganisha Cristiano Ronaldo wakuwe mu bahanganye na we

Ibyo Modric yabitangaje ku wa Mbere, tariki ya 18 Ugushyingo 2024, mbere y'umukino wahuje ikipe y'igihugu ya Croatia yari igiye gucakirana n'iy'igihugu cya Cristiano Ronaldo, Portugal, aho ku rutonde rw' abakinnyi rwatangajwe n'umutoza wa Portugal, Roberto Martinez atigeze ashyiramo Cristiano Ronaldo aha umwanya abandi bakinnyi bakibyiruka.

Cristiano Ronaldo yakinannye igihe kinini na Luka Modric mu ikipe ya Real Madrid. Ni inshuti ye baraziranye cyane. Iyo bavaga muri iyo kipe bahuriragamo, bazaga guhanganira mu makipe yabo y'ibihugu.

Luka Modric yabaga arwanira ishema ry'igihugu ke cya Croatia na Cristiano Ronaldo akarwanira iry'igihugu ke cya Portugal. Kimwe mu bintu bituma Modric azirikanwa cyane mu ikipe y'igihugu ke nuko we na bagenzi be bayigejeje ku mukino wa nyuma w'igikombe cy' Isi cya 2018. Icyo gihe bagitwawe n'U Bufaransa batsinzwe ibitego 4-2.

Mu gihe Modric ari mu bakinnyi b'imbere baramutswa ikipe ye y'igihugu ya Croatia, Cristiano Ronaldo bamushyize ku ruhande kandi ari we uheruka kugira uruhare no gutsinda Croatia ibitego 2-1 muri Nzeri uyu mwaka.

Modric abajijwe kuri uko gushyirwa hanze kwa Cristiano nk'uko byatangajwe na Madrid Xtra yagize ati:"Ndamwihanganisha kuba atashyizwe ku rutonde ngo aze ahangane natwe. Ni umukinnyi wakwifuza gukina na we. Nizera ko mu minsi iri imbere nzongera nkahanganira na we mu kibuga. Nizera ko umunsi umwe bizaba."

Hagati aho, uwo mukino wahuzaga Portugal na Croatia warangiye ari 1-1.

Kuva mu mwaka wa 2012 mu ikipe ya Real Madrid, Luka Modric yakinannye na Cristiano Ronaldo imyaka y'imikino itandatu (6).

Cristiano yahagiriye ibihe byiza dore ko yatsindiye Real Madrid ibitego 450 mu mikino 438. Ibyo byamugize umukinnyi wa mbere w'iyo kipe wabashije kubatsindira ibitego byinshi.

Arusha ibitego 100 Karim Benzema. Karim yabatsindiye ibitego 354, mu mikino 648 yakiniye iyo kipe yo muri Esipanye ikunda kwitwa 'Los Blancos.' Ari imbere kandi ya Raul watsindiyeyo ibitego 323 mu mikino 741.

Uyu munya-Portugal yatwaranye na Real Madrid ibikombe 15 birimo bibiri bya Shampiyona ya Esipanye 'Laliga,' ibikombe bine bya 'UEFA Champions League n'ik' Isi cy'ama-clubs 'FIFA Club World Cup.'

Yatwariyeyo kandi 'Copa del Rey,' na 'Supercopa de Espana.'