Yavukiye hafi y'U Rwanda! Ibyo wamenya kuri Nyampinga mushya wa Uganda 2024/25, Natasha Nyonyozi

Ku mugoroba wo ku wa Gatandatu, tariki ya 03 Kanama 2023, mu gihugu cya Uganda batoye Nyampinga wa Uganda 2024/25. Ikamba ryambitswe Miss Natasha Nyonyozi uvuka i Kabale, ahita asimbura Miss Hannah Karema waryambitswe umwaka ushize.

Uyu mukobwa Nyonyozi yahigitse abakobwa 28, ubundi agaragirwa n'ibisonga bibiri; icya mbere ni Suraya Umeimah n'icya kabiri, Joan Nabatanzi. Yahise asimbura ku mugaragaro Miss Hannah Karema Tumukunde watsindiye iry'igihe gishize. Ni ikamba we yambitswe ku wa 08 Werurwe 2023, agirwa Nyampinga wa Uganda 2023/24.

Amaze gutorwa yabwiye itangazamakuru ati:"Inzozi zo kuba Nyampinga nazigize mfite imyaka 10. Kugira ngo negukane iri kamba, nabifashijwemo n'ababyeyi ndetse n'abafana banjye. Iri kamba ngiye kurikoresha mu guhindura ubuzima; mbe ijwi ry'abangavu babyaye indi zitateganyijwe, mvugire abakobwa batabasha kwiga n'abatabasha kubona ubuvuzi."

Miss Natasha Nyonyozi ni inde?

Miss Natasha Nyonyozi afite imyaka 23, akaba yaravukiye ndetse akurira i Kyonyo mu gace ka Kamuganguzi, hafi y'umupaka wa Katuna mu karere ka Kabale, mu gihugu cya Uganda.

Kabale ni agace kari hafi y'igihugu cy'U Rwanda; gaherereye mu majyaruguru y'U Rwanda.

Natasha yize muri kaminuza yitwa 'Coventry University ' iherereye mu Bwongereza. Yahakuye impamyabumenyi y'ikiciro cya kabiri cya kaminuza mu bijyanye n'imari n'ibarurishamibare.

Yarasanzwe ari rwiyemezamirimo akaba yaranashinze inzu ikora ibijyanye n'ubwiza cyitwa 'Give Hive' iherereye ahitwa Kisementi.

Amaze kumva ko hagiye kuba irushanwa rya Nyampinga wa Uganda 2024/25, yararyitabiriye agera no muri 28 bagaragaye bahatanye kuri Sheraton Hotel.

Mbere y'umuhango wa nyuma (Grand Finale) wo gutanga ikamba rya Nyampinga wa Uganda, yagiye agaragaza imyitwarire irimo kwigirira icyizere, umutima utanga, gukunda kuba Nyampinga n'ubushongore.

Natasha yitwaye neza mu bandi bakobwa bari bahanganye, ubundi bamutora nk'umuyobozi w'igihe cyabo 2024/25 (President of the Miss Uganda class of 2024/25).

Ibyo babimutoreye mbere y'umunsi 1 ngo igihe cy'umuhango wa nyuma (Grand Finale ) cyigere. Bamaze kubimutorera yahise yiremamo icyizere ko ashobora kuzegukana ikamba. Inzozi ze zabaye mpamo ubundi mu ijoro ryo ku wa Gatandatu, tariki ya 03 Kanama 2024, yambikwa ikamba rya Nyampinga wa Uganda 2024/25.

Umuhango wa nyuma wo kwambika ikamba (Grand Finale 2024)  witabiriwe n'abashyitsi batandukanye barimo Miss Uganda 2023/24, Hannah Karema Tumukunde, Miss Tanzania, Halima Ahmad Kopwe na Miss World Africa 2024 akaba ari na we Miss Botswana 2022, Lesego Chombo.

Miss Natasha Nyonyozi yagaragiwe n'ibisonga bibiri