Bobi Wine yahishuye impamvu azafasha abateguye imyigaragambyo izerekeza ku nteko ishinga amategeko ya Uganda

Robert Kyagulanyi Ssentamu uzwi nka Bobi Wine yavuze ko ishyaka rye, NUP, rishyigikiye imyigaragambyo yateguwe n'urubyiruko kubera ko igamije kurwanya ruswa n'akarengane. Ni imyigaragambyo bavuze ko izaba ku munsi wa Kabiri, tariki ya 23 Nyakanga 2024, bakazahurira hamwe mu mujyi wa Kampala, ubundi berekeze ku nteko ishinga amategeko ya Uganda.

Bobi Wine wigeze kuba Umudepite mu nteko ishinga amategeko, ashinga ishyaka ryitwa The National Unity Platform (NUP) ritavuga rumwe na Leta ya Uganda, yahishuye ko ishyaka rye atari ryo ryateguye imyigaragambyo izaba ku wa Kabiri, ariko ngo bazayishyigikira.

Yagize ati:"Imyigaragambyo iteganyijwe kuba ku wa 23 Nyakanga 2024, ntabwo yateguwe na NUP. Ariko tugomba gufasha abayiteguye kubera ko turi imbaraga z'abaturage kandi twizerera mu buyobozi bw' abaturage. Turabafasha kandi kubera ko ari imyigaragambyo yo kurwanya ruswa, akarengane n'imiyoborere mibi."

"Guverinoma irerekana ko yateguwe na NUP mu rwego rwo kuyica intege. Iriya myigaragambyo yo kurwanya ruswa yateguwe n'urubyiruko rwisunze hatagendewe ku idini, aho bakomoka cyangwa se ku mutwe wa politike."

Bobi Wine ni kenshi yagiye yumvikana mu itangazamakuru anenga Guverinoma ya Uganda, avuga ko bafite imiyoborere mibi yamunzwe na ruswa.

Icyapa gihamagarira abantu kwigaragambya aho mu gihugu cya Uganda, cyiragaragaza ko iyo myigaragambyo izaba ku wa Kabiri, tariki ya 23 Nyakanga 2024. Bateganyije kuzakora urugendo karundura rugana ku nteko ishinga amategeko ya Uganda, bamaganira kure ruswa.

Ku wa 23 Nyakanga 2024, muri Uganda hateganyijwe imyigaragambyo  yo kurwanya ruswa n'akarengane