IBANGA RY’UBUZIMA: Ubuzima bwawe s’impanuka, hari intego ikomeye!
Ubuzima bw’umuntu si impanuka cyangwa igikorwa kidafite icyerekezo. Kuva mu ntangiriro, iyo dusomye muri Bibiliya, tubona ko Imana yaremye umuntu ifite umugambi usobanutse kandi wuzuye urukundo. Mu Itangiriro handitswe ko umuntu yaremwe mu ishusho y’Imana, bivuze ko afite agaciro kihariye, inshingano, n’icyerekezo mu isi. Ibi bitwereka ko ubuzima atari urugendo rudafite intego, ahubwo ari urugendo rugamije kugera ku ntego yateguwe n’Umuremyi.
Umugambi w’Imana ku buzima bw’umuntu ujyanye no kumenya Imana, kuyikunda, no gukorera abandi mu rukundo n’ukuri. Si ugukora gusa no gushaka imibereho, ahubwo ni ukubaho mu kuri, mu butungane, no mu mahoro. Nubwo umuntu ahura n’ibigeragezo, imibabaro n’inzitizi, ibyo byose ntibibuza umugambi w’Imana gusohora; ahubwo akenshi ni byo Imana ikoresha ngo itunganye, yigisha kandi itegure umuntu ku rwego rwisumbuyeho.
Iyo dusobanukiwe ko hari umugambi wihariye ku buzima bwacu, bituma tubaho dufite ibyiringiro n’icyizere. Ntituba tukiri mu rujijo cyangwa mu bwoba bw’ahazaza, kuko twiringira ko Imana iyobora intambwe zacu. Kumenya umugambi w’Imana bituma umuntu amenya agaciro ke, akamenya impamvu ariho, kandi agaharanira kubaho ubuzima bufite umumaro ku bandi no ku Mana.
Umugambi w’Imana si uwo kudutesha agaciro, ahubwo ni uwo kuduhesha icyubahiro n’ubugingo busesuye.
Iyo Imana iguhaye ubuzima, iba yaguhaye n’intego; nta muntu ubaho ku bw’impanuka.
Umugambi w’Imana ntupimirwa ku mibabaro duhura na yo, ahubwo upimirwa ku musaruro w’ubugingo twerera abandi.
Imana ntiyita ku byo ufite gusa, ahubwo ireba umutima wawe n’uko witwara mu nzira yawe.
Iyo inzozi zawe zidahura n’ukuri, humura; Imana ishobora kuba igutegurira ibirenze ibyo watekerezaga.
Kumenya umugambi w’Imana bisaba gusenga, kwihangana no kwemera kuyoborwa.
Nubwo inzira iba ndende, Imana ntiyibagirwa uwo yaremye.
Umugambi w’Imana ntuhindurwa n’ibitekerezo by’abantu; uhindurwa no kumvira no kwizera.
Icyiza kurusha ibindi si ukumenya ejo hazaza, ahubwo ni ukumenya utegura ejo hazaza.
Umugambi w’Imana ku buzima bw’umuntu ni impano ikomeye igaragaza urukundo rwayo. Nubwo tudahita dusobanukirwa byose bibera mu buzima bwacu, ukwizera kudufasha kumenya ko hari impamvu irenze ibyo amaso yacu abona. Iyo twiringiye Imana kandi tugaharanira kugendera mu bushake bwayo, tugera aho tubona ko n’ibigeragezo byadutozaga kwihangana no gukura mu mwuka.
Ubuzima bufite umumaro ni ubushingiye ku kumenya no kwemera umugambi w’Imana. Ibyo biduha amahoro, biduha icyizere, kandi bikadutera imbaraga zo gukomeza urugendo nubwo haba hari imisozi n’ibibaya. Bityo rero, umuntu akwiriye guhora ashaka kumenya icyo Imana imusaba, akayisaba kumuyobora, kandi akizera ko ibyo yamugeneye ari byiza kandi birambye.
Nugendera mu mugambi w’Imana, ntuzabaho nk’uyoba, ahubwo uzabaho nk’ufite icyerekezo, ufite intego, kandi ufite ibyiringiro bidashira.
Philemon Burgin
What's Your Reaction?
