Hehe na mukorogo : Koresha karoti ugire uruhu rucyeye kandi rutoshye
Niba ushaka gucya, ukagira uruhu rutohagiye kandi rudafite amabara, si ngombwa gukoresha amavuta atukuza ahubwo karoti zabigufashamo ugasa neza
![Hehe na mukorogo : Koresha karoti ugire uruhu rucyeye kandi rutoshye](https://www.igisubizo.com/uploads/images/202310/image_870x_65266e7c47136.jpg)
Karoti zikize kuri za vitamine n’imyunyungugu bitandukanye uruhu rwacu rukenera kugirango rucye, rworohe kandi ruse neza ndetse inakora ku bantu bose baba abafite uruhu rwirabura ndetse n’abafite uruhu rwera.
Muri izo ntungamubiri harimo :
· Bêta carotène (Betakarotene) iyi ikaba ari yo ihinduka Vitamine A iyo imaze kugera mu mubiri
· Vitamine A ifasha ku misatsi, ku nzara no ku ruhu, kubura vitamine A bitera kugira uruhu rwumagaye
· vitamine B3, B5, B6 na B9 zose zifatanyiriza hamwe mu kongera ubwiza bw’uruhu
· vitamine C irwanya gusaza k’uruhu
· vitamine E yongerera uruhu itoto, ikarurinda kubyimbirwa no kwangizwa n’imirasire y’izuba
· Harimo kandi carotène (Karotene) irinda uruhu kwangizwa n’imirasire y’izuba.
WAKORESHA UTE KAROTI NGO UKESHE URUHU RUSE NEZA?
- karoti ivanze n’ubuki
Fata karoti 2 cyangwa 3 uzikatagure uzisye
Niba udafite uko wazisya uzitogose mu mazi kugirango ubashe kuzinomba
Ongeramo ibiyiko 2 cyangwa 3 by’ubuki, uvange neza
Urwo ruvange rusige mu maso hawe no ku ijosi ubirekereho iminota 15
Nyuma y’iyo minota ugakaraba neza n’amazi akonje cg y’akazuyayi
Ukabikora buri munsi kugeza ubonye impinduka.
2. KAROTI IVANZE N’INDIMU
Aha biba byiza iyo ukoresheje karoti mbisi kuko iyo zitetse za ntungamubiri ziragabanuka
· Fata karoti uzironge neza uzisye
· Kamuriramo indimu niba ufite na ka persil ugashyiremo ushobora no gukamuriramo amaronji, hanyuma ubisye neza maze icyo gipondo abe ari cyo ukoresha
· Siga mu isura yawe no ku ijosi ubirekereho iminota 10 cyangwa 15 ubone gukaraba n’amazi y’akazuyazi
· Ubikoresha byibura kabiri mu cyumweru kugirango mu kwezi uzabe ubonye impinduka
3. UMUTOBE WA KAROTI
· Aha bisaba kuba ufite akuma gakora imitobe (Jus)kugirango ubashe gukora umutobe wa karoti
· Ufate karoti ukazishyira muri mixeur cg juicer ubundi ukazisya, ugasukamo amazi ashyushye macye kugirango ubone umutobe umeze neza, ukongera ugasya
· Iyo bimaze kwivanga urabireka bigahora, ubundi umutobe ukaba urabonetse
· Wusuke mu kantu gapfundikirwa gafite isuku ubike umutobe wawe muri firigo aho wawukoresha mu gihe cy’icyumweru utarangirika.
· Mu kuwukoresha, uwusiga mu maso no ku ijosi ukawumazaho iminota 10 ukabona gukaraba n’amazi y’akazuyazi bisanzwe.
· Ubikora buri munsi mugitondo na nimugoroba kugirango ubone impinduka vuba.
4. AMAVUTA YA KAROTI WIKOREYE
Aya mavuta ni meza ariko kubera ko adakorana n’izuba kuko atera icyokere akaba yakubabura ahaje icyokere hagatukura cyane kuruta ahandi, ni byiza kuyisiga nimugoroba gusa.
UKO AKORWA:
· Fata karoti ukazirapa cyangwa se ukazisya
· Ugafata ipanu ukayishyira ku ziko ugasukaho amavuta akomoka ku bimera nk’amavuta ya elayo, akoze mu bihwagari cg akoze muri sesame (amavuta ushyiraho aba ari menshi mbese yakuzura agacupa uri buyabikemo ukajya uyisiga).
· Yamara gushyuha ugashyiramo za karoti warapye cg ziseye ugakaranga, uko ugenda uvanga ni ko ubona ko ya mavuta agenda ahindura ibara agasa nk’ibara rya karoti
· Nyuma urayungurura karoti ukazijugunya ugasigarana amavuta yonyine, ukareka agahora ubundi ukayasuka mu gacupa gapfundikiye ukajya uyakoresha.
·
Mu kuyakoresha :
Ufata ikiyiko kinini cy’ayo mavuta ya karoti wakoze, ukavanga n’ikiyiko cy’ubuki ndetse n’ikiyiko cya Yawurute.
Ukabisiga mu maso bikamaraho iminota 15 ukabona gukaraba mu maso n’amazi y’akazuyazi.
Ubu ni bwo buryo wakoresha niba ushaka kugira uruhu rukeye, rutoshye, kandi rusa neza.
What's Your Reaction?
![like](https://www.igisubizo.com/assets/img/reactions/like.png)
![dislike](https://www.igisubizo.com/assets/img/reactions/dislike.png)
![love](https://www.igisubizo.com/assets/img/reactions/love.png)
![funny](https://www.igisubizo.com/assets/img/reactions/funny.png)
![angry](https://www.igisubizo.com/assets/img/reactions/angry.png)
![sad](https://www.igisubizo.com/assets/img/reactions/sad.png)
![wow](https://www.igisubizo.com/assets/img/reactions/wow.png)