Harimo uw'imyaka 11! Dore aba-youtubers 5 bahembwa agatubutse ku Isi
Urubuga rwa YouTube rumaze kuba isoko y'umutungo wa benshi. Hari abaruhwanisha n'umunani umwana ahabwa n'umubyeyi ngo uzamurengere, abonemo ikibanza, inzu unamutungire umuryango. Ni urubuga rukoreshwa mu bihugu byinshi ku Isi. Hari abaruyobotse barubyaza amafaranga menshi barimo uwitwa MrBeast.
Urubuga rwa YouTube ruzwiho kuba urubuga rureberwaho amashusho y'indirimbo, hari abafunguyeho konti bacishaho ibindi bintu bigakundwa cyane, na bo bagakuramo agatubutse. Ubu uyoboye abandi mu gukurikirwaho cyane ni Umunyamerika witwa Mr Beast ukurikirwa n'abarenga miliyoni 390.
Urubyiruko rwahagurikiye uru rubuga rurarukoresha maze bunguka abatari bake babakurikiraho ari nako babinjiriza amafaranga menshi.
Aba ni abarukoresha barusaruramo agatubutse:
1.Mr Beast
Uru rutonde ruyobowe na James Stephen Donaldson uzwi na benshi nka Mr Beast.
Uyu musore w'imyaka 27 shene ye ya YouTube yitwa Mr Beast ikurikirwa n'abarenga miliyoni 390.
Muri uyu mwaka The Economic Times yanditse ko atunze agera kuri miliyari 1 y'Amadolari y'Amerika.
YouTube yatumye afungura ibigo birimo Beast Burgers, Feastables, Beast Gaming n'ibindi. Ibyo bituma abarirwa ko yinjiza agera kuri miliyoni 120 z'Amadolari ku mwaka.
2. Jeffree Star
Jeffree ni umugabo w'imyaka 39 afite shene ya YouTube acishaho ibijyanye n'amasomo y'ubwiza; uko batunganya ibirungo n'uburyo babisiga neza. Uwo mwuga ukorwa cyane n'abigitsinagore, abagiye kuwinjiramo usanga bamugana bakihugura, we agasaruramo abamukurikira n'amafaranga.
Ubu abamukurikiraho bamaze kugera kuri miliyoni 15.7. Abarirwa ko atunze agera kuri miliyoni 200 z' Amadolari y'Amerika.
3. Logan Paul
Logan Paul ufite imyaka 30 aza ku mwanya wa gatatu mu bahembwa agatubutse na YouTube.
Uyu musore yakoze imirimo itandukanye irimo kuba mu bakina imikino yo gukirana muri Amerika izwi nka World Wrestling Entertainment byatumye agaragaza ko afite impano zitandukanye.
Afite ibiganiro akora kuri YouTube acisha ku muyobora uzwi nka "Impaulsive with Logan Paul" abarirwa mu mafaranga angana na miliyoni 150 z' Amadolari y'Amerika.
4. Like Nastya
Uyu ni umwana w'imyaka 11 wahogoje abakoresha YouTube cyane cyane abana. Akurikirwaho n'abagera kuri miliyoni 127. Abenshi bamukundira amashusho magufi n'amaremare abasangiza.
Yavukiye mu gace ka Krasnodar mu Burusiya ubu n'ababyeyi be babana i Miami muri Florida.
Abarirwa ko atunze agera kuri miliyoni 104 z' Amadolari y'Amerika.
Ryan Kaji uzwi nka Ryan's World ari ku mwanya wa gatanu. Uyu na we ni muto mu bahiriwe na YouTube kuko afite imyaka 12 y'amavuko ariko akundwa n'abayikoresha afiteho abamukurikira bagera kuri miliyoni 39.2, akaba abarirwa ko atunze agera kuri miliyoni 100 z' Amadolari y'Amerika.
What's Your Reaction?
