Harimo abaganga: Uburanga bw’abakobwa 19 bahagarariye Afurika mu irushanwa ry’ubwiza rya Miss Universe 2024 (Amafoto)

Abakobwa 128 bamaze kugera mu gihugu cya Mexique aho bagiye guhatanira ikamba rya Miss Universe 2024 rigiye kuhatangirwa ku nshuro ya 73. Muri abo bakobwa harimo Abanyafurika 19 bahagarariye ibihugu birimo; Nigeria, Afurika y’Epfo, Misiri (Egypt), Namibia, na Zimbabwe.

Iryo rushanwa rizaba rigizwe n’amarushanwa atandukanye harimo kurushanwa mu gutambuka neza ku rubyiniro, kwambara imyenda yo kogana, kugaragaza impano no kurushanwa mu gutanga ibiganiro, ibyo byose n’ibindi, bizerekana umukobwa ukwiye kwegukana ikamba rizatangwa ku wa 16 Ugushyingo 2024.

Umukobwa wo mu gihugu cya Nicaragua ubitse iryo ikamba witwa Sheynnis Palacios ni we uzambika ikamba uzaba aritsindiye.

Abakobwa 19 bahagarariye Afurika, bategerejweho gutanga ikinyuranyo hakaba havamo  uwakwegukana ikamba nk’uko Umunyafurika y’Epfo Zozibini Tunzi yabikoze mu mwaka wa 2019.

Igisubizo.com igiye kubereka amafoto y’abakobwa 19 bahagarariye Afurika.

Miss Universe Angola, Nelma Tchissola Ferreira

Nelma Ferreira ni umukobwa w’imyaka 26 wo mu gihugu cya Angola. Yize ibijyanye n’imicungire ya kompanyi. Ahugiye mu bikorwa by’ubukorerabushake  aho atanga umusanzu we mu kuzamura imyumvire kugira ngo abantu basobanukirwe uburinganire n’ubwuzuzanye. Aharanira kandi ko abantu bihaza mu biribwa.

Miss Universe Botswana, Thanolo Keutiwile

Thanolo ni umukobwa w’imyaka 28 umurika imideri akabifatanya n’akazi k’ubuganga aho avura ku bitaro bya ‘Marina Hospital’ biri mu murwa mukuru wa Botswana, Gaborone.

Miss Universe Cameroon, Noura Njikam

Noura ni umukobwa w’imyaka 25 wo mu gihugu cya Cameroon. Yihebeye ibijyanye no kurinda ibidukikije aho agaragara mu mahuriro atandukanye agamije kubirinda no kubyitaho. Intego ye ni ukuzana impinduka nziza ku Isi.

Miss Universe Democratic Republic of the Congo (DR Congo), Ilda Amani

Ilda Amani Dorcas w’imyaka 26 uhagarariye DR Congo ni umukobwa ukoresha imbuga nkoranyambaga aho afite ibiganiro atambutsaho. Ni impirimbanyi y’ikiremwamuntu, amurika imideri ikindi kandi akunda kwitabira amarushanwa y’ubwiza.

Miss Universe Cote d’Ivoire, Marie- Emmanuella Diamala

Marie-Emmanuella Diamala ni umunyeshuri w’imyaka 20 wihebeye ibijyanye no kurinda ibidukikije no kwita ku muryango mugari.

Miss Universe Equatorial Guinea, Diana Dashaira Mouhafo

Diana ni umukobwa w’imyaka 25 yize ibijyanye n’ubucuruzi no kwamamaza, yongeyeho kwiga ibijyanye n’icungamutungo. Uretse ibyo kandi, afite uburambe bungana n’imyaka 6 mu kumurika imideri.

Miss Universe Egypt, Logina Salah

Logina ni umugore w’imyaka 34 ukora akazi ko kumurika imideri no gukora kuri televiziyo.  Mu mwaka wa 2020 yahawe igihembo na ‘World Women Foundation’ cy’umugore wigize unavuga rikumvikana.

Miss Universe Eriteria, Snit Tewoldemedhin

Snit ni umukobwa w’imyaka 25, amenyereye ibintu by’amarushanwa y’ubwiza dore ko mu mwaka wa 2023 yambitswe ikamba rya Miss Africa USA. Uyu mukobwa yihebeye umurimo wo kuvugira abana bafite ubumuga.

Miss Universe Guinea, Sarah Bah

Sarah ni umukobwa w’imyaka 29 watangiye umurimo wo kumurika imideri mu myaka 19 ishize, akaba yaregukanye ikamba rya ‘Miss Guinea’ mu mwaka wa 2019. Yitabiriye irushanwa rya ‘Miss World’ mu mwaka wa 2021. Ubu akora mu bijyanye no kwita ku kiremwamuntu.

Miss Universe Kenya, Irene Ng’endo

Irene ni umukobwa w’imyaka 26 ufite ubumenyi mu kubyina, akaba ari umwarimu, umushoramari n’inzobere mu guhugura abantu mu bwenge bw’ubukorano (Artificial Intelligence, AI).

Miss Universe Mauritius, Tania Rene

Rene ni umukobwa w’imyaka 27, ukora umurimo wo kumurika imiderii. Yashoye mu mishanga igamije ku guteza imbere uwo mwuga wo kumurika imideri. Kwisanga mu muco w’Abayapani byamufashije gutera imbere kubera ko yagendaga akurura umuryango mugari w’Abayapani bigatuma bamukunda.

Miss Universe Namibia, Prisca Anyolo

Prisca ni umunyamakuru w’imyaka 28 akaba na nyiri ikigo gicuruza ibirugo by’ubwiza ‘Elysian Beauty Parlour.’

Miss Universe Nigeria, Chidimma Adetshina Vanessa

Chidimma w’imyaka 22 wavuzwe cyane mu minsi yashije kubera gukurwa mu irushwa rya ‘Miss South Africa 2024’ agahita yitabira Miss Universe Nigeria bikarangira aryegukanye, ubu ni we uhagarariye Nigeria muri iryo rushanwa.

Miss Universe Senegal, Fatou Bintou Gueye

Fatou ni umukobwa ufite imyaka 23 intego ye ni ukuzamura impano z’abana b’abakobwa. Mu minsi yashize yatangije gahunda yo kubatinyura ngo bamurike umuco wa Senegal.

Miss Universe Somalia, Khadija Omar

Khadija ni umukobwa w’imyaka 23, ufite inkomoko mu gihugu cya Somalia. Kubera intambara yo muri icyo gihugu, we n’umuryango we bahungiye muri Kenya, nyuma baza kujyana kuba muri Canada. Ubu ahagarariye Somalia muri ayo marushanwa. Ni umunyeshuri wiga ibijyanye n’ubuzima bwo mu mutwe.

Miss Universe South Africa, Mia Le Roux

Mia Le Roux ni umukobwa ufite ubumuga bwo kutumva w’imyaka 28, ku wa 10 Kanama 2024 yegukanye ikamba rya ‘Miss South Africa.’

Miss Universe Tanzania, Judith Peter Ngusa

Judith w’imyaka 26 ni impirimbanyi y’ubuzima, aba I Dar Es Salaam muri Tanzania. Si mushya mu bijyanye n’amarushanwa y’ubwiza kuko mu mwaka wa 2022 yegukanye ikamba ry’ubwiza rya ‘Miss United Nations 2022.’ Yanageze mu 10 ba nyuma ba ‘Miss Tanzania 2019.’

Miss Universe Zambia, Brandina Lubuli

Brandina ufite imyaka 28, yanditse amateka yo kuba umugore washinze n’urugo wahagarariye Zambia mu irushanwa rya ‘Miss Universe.’ Yashinze umuryango Brandina Lubuli Foundation (BLF) ugamije ku gukora ubuvugizi no guteza imbere uburezi bw’abagore n’abakobwa.

Miss Universe Zimbabwe, Sakhile Dube

Sakhile w’imyaka 25 akora mu bijyanye no kumurika imideri, guteza imbere ubuvuzi no kuzamurira ubushobozi urubyiruko biciye mu kurukangurira gukura amaboko mu mifuka rugakora rukihangira n’imirimo.