Hakim Ziyech wakiniye Chelsea yerekeje muri Wydad yo muri Morocco
Umukinnyi w'ikipe y'igihugu ya Morocco, Hakim Ziyech wakiniye amakipe akomeye ku mugabane w'i Burayi nka Chelsea yo mu Bwongereza na Ajax yo mu Buholandi, yerekeje muri Wydad Casablanca y’iwabo muri Morocco.
Ni amakuru yagarutsweho cyane n’ibitangazamakuru bitandukanye ndetse n’abanyamakuru bakomeye ku mugabane w'i Burayi, nk'Umutaliyani Fabrizio Romano uzwiho gutangaza amakuru y’abakinnyi ajyanye n'igura n’igurisha.
Hakim Ziyech w’imyaka 32, bivugwa yamaze kumvikana n'iyi kipe ya Wyada Athletic Club yo mu gihugu cy'ababyeyi be, kuyisinyira amasezerano y'umwaka umwe.
Ziyech yavukiye mu Buholandi gusa ku babyeyi bakomoka muri Morocco, ndetse yakiniye amakipe mato y’iki gihugu mbere yo kwemera gukinira igihugu cy'ababyeyi be.
Ziyech yatwaranye UEFA Champions League na Chelsea mu 2021
Uyu mukinnyi ukina mu kibuga hagati asa n'utaha izamu, yagaragaye cyane ubwo yari muri Ajax Amsterdam yakiniye mbere yo kujya muri Chelsea yo mu Bwongereza, yanatwaranye nayo UEFA Champions League ya 2020-2021.
Mu 2023, yaje kujya muri Galatasalay yo muri Turkey, nyuma yo kubura umwanya ubanzamo muri Chelsea. Naho ntiyahabaye igihe kinini kuko yaje kujya muri Al-Duhail yo muri Qatar, ari na yo yeherukagamo mbere y'uko asoza amasezerano.
What's Your Reaction?
