Hakim Sahabo arifuzwa n'amakipe arimo Atalanta yo mu Butaliyani
Umukinnyi w'ikipe y'igihugu y'u Rwanda 'Amavubi', Hakim Sahabo arifuzwa n'amakipe yo mu cyiciro cya mbere mu Butaliyani, arimo Atalanta na Bologna bivugwa ko yamaze kohereza abatahura impano (scouts) kugira ngo bige kuri umuhungu ukinira Standard de Liège yo mu Bubiligi.
Nk’uko bitangazwa n'ibitangazamakuru nka Tuttomercatoweb na Football Italia, aya makipe akina shampiyona y'icyiciro cya mbere mu Butaliyani (Serie A) amaze iminsi akurikirana bya hafi uyu mukinnyi wujuje imyaka 20 muri Kamena.
Aya makipe kandi ngo yohereje abatahura impano babo kureba imikino ye inshuro nyinshi mu byumweru biheruka.
Hakim Sahabo yavukiye ndetse akuririra mu Bubiligi, gusa ahitamo gukinira u Rwanda, igihugu cy'umubyeyi we (Nyina) akaba amaze gukinira Amavubi imikino icyenda ku rwego rw’abakuze.
Uyu musore yanyuze mu ishuri ry’abato rya Standard de Liège, hanyuma aza no gukinira Lille na Beerschot VA, mbere yo kugaruka muri Standard de Liège mu mpeshyi ishize.
Imbuga zimwe zikora ku bijyanye n'agaciro k'abakinnyi, zivuga ko Hakim Sahabo ku isoko agurishwa abarirwa hagati ya miliyoni 6 kugeza kuri zirindwi z'ama-Euro.
Hakim Sahabo ni umwe mu bakinnyi Amavubi y'u Rwanda ahanze amaso
What's Your Reaction?
