Gen. Kainerugaba yifatiye ku gahanga Bobi Wine amwita 'ikigoryi'

Gen. Muhoozi Kainerugaba uri mu nshingano zo kuba Umugaba mukuru w'Ingabo za Uganda akaba n'umujyanama mukuru wa Perezida Museveni mu bya gisirikare, yabwiye amagambo akomeye Bobi Wine arimo kumwita 'ikigoryi' anamuteguza ko azakubitwa inshuro mu matora bimirije imbere.

Uyu mugabo ukunda kugarukwaho kubera amagambo atungurana cyane acisha ku rubuga rwa X, yashimagije uwitwa Mathias Mpuuga. 

Ati:"Uyu mugabo asa neza akwiye kuba Perezida. Ni umunya-politike mwiza utanga ibitekerezo byubaka."

Ntiyagarukiye aho kuko yagarutse ku muhanzi akaba n'umunya-politike utavuga rumwe n'ubutegetsi bwa Museveni, Bobi Wine, avuga ko adakwiye kwigereranya na Bob Marley.

Yagize ati:"Kabobi agerageza kwijijisha abeshya ko ari umusimbura wa Bob Marley. Mbere na mbere, Bob Marley yaririmbye indirimbo zitazibagirana! Bob Marley yari umugabo mwiza ufite amenyo ari ku murongo. Ariko amenyo ya Kabobi ntari ku murongo."

Yakomeje amwita utagira ubwenge. Ati:"Kabobi nta bwenge agira 'ni ikigoryi,' azanatsindwa mu matora azaba mu minsi iri imbere."

Ni amagambo yazamuye amarangamutima ya benshi mu bakoresha urubuga rwa X, bavuga ko yamwiyenjejeho akoresheje imbuga nkoranyambaga. Hagati aho, Bobi Wine ntabwo aragira icyo asubiza kuri ayo magambo.

Gen. Kainerugaba yavuze ko Bobi Wine adafite ubwenge anamuteguza gutsindwa amatora