Fata icyemezo uyu munsi: Uko wahitamo kuba wowe, aho kuba igikoresho cy’abandi

Nudakora cyane ngo inzozi zawe zibe impamo, uzisanga buhoro buhoro zicika intege, zigahinduka igicucu cy’icyifuzo cyigeze kuba kizima mu mutima wawe. Ubuzima bufite uburyo butangaje bwo kugushuka bukakwemeza ko hari undi uzakora ibyo wagombaga gukora, cyangwa ko igihe kizagera ibintu bikikora. Ariko ukuri guca amarenga ntikujya guhishira: iyo udahagurutse ngo wirwaneho, abandi baguhindura inzira banyuramo bagana ku nzozi zabo.

Hari igihe wicara ukareba abandi batera imbere, bagaseka, bagatsinda, maze wowe ukumva hari ikintu kikubwira uti “nanjye nabishobora.” Ariko icyo gihe kigashira utagize icyo ukora. Buhoro buhoro, ugasanga aho kuba wowe ugera ku ntego zawe, uri mu bikorwa by’abandi, ubafasha gusohoza ibyo wifuzaga. Ibyo si uko udafite ubushobozi, ahubwo ni uko wiyemereye kuba igikoresho aho kuba umuyobozi w’ubuzima bwawe.

Inzozi ntizigerwaho n’uwicaye, n’uwibwira ko ejo hazaza ari ho hazamuhesha amahirwe. Inzozi zisaba kubira ibyuya, kwihangana, gutsindwa ugasubira ku rugamba. Bisaba guhangana n’ubwoba, no kwemera ko inzira itazahora yoroshye. Ariko se hari ikintu cy’agaciro cyigeze kigerwaho mu buryo bworoshye? Iyo uhisemo gukora, n’iyo byakugora gute, uba uhisemo kwiyubaka, uba uhisemo kuba uw’agaciro ku buzima bwawe bw’ejo.

Ntukemere kuba igicucu cy’inzozi z’abandi. Ntukemere ko abandi bagena aho ugera n’icyo uba cyo. Fata icyemezo uyu munsi, wumve ko ubuzima bwawe ari inshingano yawe bwite. Nta wundi uzaza kubukubakira. Nta wundi uzabaho ubuzima bwawe. Icyo usabwa ni uguhaguruka, ugatangira aho uri, uko waba umeze kose.

Kuko umunsi uzagera wisange ubajije umutima wawe uti: “Ese nakoze ibyo nagombaga gukora?” Kandi icyo gihe, igisubizo kizaba gishingiye ku byo wahisemo uyu munsi. Hitamo gukora. Hitamo guharanira inzozi zawe. Hitamo kuba wowe, utari igikoresho cy’abandi, ahubwo uri umuntu wubaka ejo hazaza he n’amaboko ye.

 Philemon Burgin