Euro2024: Ni we mwana ubikoze! Lamine Yamal yafashije Esipanye gutsinda U Bufaransa

Mu mukino wahuzaga U Bufaransa na Esipanye wa 1/2 w'imikino ya nyuma y'amakipe y'ibihugu byo ku mugabane w'i Burayi (Euro 2024) irimo irasorezwa mu gihugu cy'U Budage, umuhungu w'imyaka 16 yagaruriye icyizere Abanya-Esipanye ubwo yishyuraga igitego ku munota wa 21.' Yishyuraga icyari cyatsinzwe na Randal Kolo Muani ku munota wa 9.'  

Uwo mukino w'indyankurye wabaye mu ijoro ryo ku wa 09 Nyakanga 2024 kuri sitade yo mu Budage yitwa Allianz Arena, wari witeguwe ku mpande zombi.

Ku ruhande rw'ikipe y'igihugu ya Esipanye, mu kibuga hari habanje:

Umunyezamu: Unai Simon;

Ba myugariro: Jesus Navas, Nacho Fernadez Iglesias, Aymeric Laporte, na Marc Cucurella;

Abakina hagati mu kibuga: Fabian Ruiz, Rodrigo Hernandez, na Dani Olmo;

Ba rutahizamu: Lamine Yamal, Alvaro Morata, na Nico Williams Jr.

Ababanje mu kibuga ku ruhande rw'ikipe y'igihugu y'U Bufaransa ni:

Umunyezamu: Mike Maignan;

Ba myugariro: Theo Hernandez, William Saliba, Dayot Upamecano na Jules Kounde;

Abakina hagati mu kibuga: Adrien Rabiot, Aurélien Tchouaméni, N'Golo Kanté;

Ba rutahizamu: Kylian Mbappé, Randal Kolo Muani na Ousmane Dembéle.

Ikipe y'igihugu y'U Bufaransa ni yo yafunguye amazamu ku munota wa 9.' Kuri uwo munota, igitego cyatsinzwe na Randal Kolo Muani, maze ku munota wa 21' umusore ukuri muto witwa Lamine Yamal arakishyura. Byahise bigarura mu mukino ikipe ye y'igihugu ya Esipanye. Mugenzi we witwa Dani Olmo yatsinze icy'itsinzi ku munota wa 25.' Umukino urangira ari 2-1.

 Esipanye yahise igera ku mukino wa nyuma uzaba ku Cyumweru, tariki ya 14 Nyakanga 2024, aho izahura n'ikipe iza kuva hagati y'U Buholandi n'U Bwongereza.

Lamine Yamal uri hafi kuzuza imyaka 17, dore ko afite imyaka 16 n'iminsi 362, ni we musore ukuri muto ubashije gutsinda igitego mu mikino ya nyuma ya Euro. Uwarubitse ako gahigo ni Umusuwisi, Johan Vonlanthen, wagitsinze U Bufaransa mu mwaka wa 2004, afite imyaka 18. 

Lamine Yamal ni inde?

Amazina ye bwite ni Lamine Yamal Nasraoui Ebana yavutse ku wa 13 Nyakanga 2007 avukira mu gihugu cya Esipanye. Papa we ni Umunya-Maroke naho mama ni Umunya-Guinée équatoriale (mu Burengerazuba bw'Afurika).

Sky sports yanditse ko uyu musore wakuranye amashyushyu yo kuba umukinnyi ukomeye bimugeza no mu ikipe abarizwamo ya Barcelona muri Esipanye, areshya na metero imwe na sanimetero 78 (1.78 m).

Lamine Yamal abarizwa mu bakinnyi bazwi nka bamababa. Ubusanzwe akina imbere ku ruhande rw'iburyo.

Lamine Yamal yafashije Esipanye kugera ku mukino wa nyuma