Ese La Reina ni mushiki wa Prince Kiiiz?Ese umuntu yasinyisha mushiki we?

Umuhanzikazi  La Reina akomeje kugarukwaho haba mu bitangazamakuru no ku mbuga nkoranyambaga bamwe bavuga ko atari mushiki w’utunganya indirimbo Prince Kiiiz ahubwo ari umukunzi we. Uyu Prince Kiiiz yahamije ko La Reina ari mushiki we.

Mu kiganiro Prince Kiiiz yagiranye na Igisubizo.com yahishuye ko La Reina ari mushiki we bavukana  ndetse bakuranye mu rugo.

Yagize ati:”Abavuga ko tutavukana ntabyo bazi. Uriya muhanzikazi La Reina ni mushiki wanjye, twarakuranye mu rugo.”

Igisubizo.com yamubajije kubivugwa ko uyu mukobwa yaba avuka mu karere ka Nyamagabe mu Ntara y’Amajyepfo, naho Prince Kiiiz akaba avuka mu mujyi wa Kigali, bikumvikana ko baba bafite ababyeyi batandukanye, ahishura ko ibyo binyuranye n’ukuri.

Yahamije ati:”Njye mumenye ko tuvukana, ni mushiki wanjye.”

Uyu mukobwa La Reina uherutse gushyira hanze indirimbo yise ‘Nditinya’ akaba yarize umuziki mu ishuri ryigisha umuziki ryahoze ku Nyundo risigaye rikorera i Muhanga.

Kubera ubuhanga akomeje kugaragaza mu muziki, uyu mukobwa yasinyishijwe na Prince Kiiiz muri studio ‘Hybrid Music’ bagirana amasezerano y’imikoranire; ajye amureberera inyungu mu by’umuziki. Abantu bibaza niba bishoboka ko umuntu yasinyisha umuvandimwe.

Prince Kiiiz yavuze ko bishoboka ko umuntu yasinyisha umuvandimwe we ngo bagirane imikoranire igendeye ku masezerano bagiranye. Yabikoze kugira ngo La Reina akomeze gukorera ku murongo usobanutse ndetse agume mu mujyo wo guteza imbere impano ye.

Uyu Prince Kiiiz ni umwe mu batunganya indirimbo bagezweho mu Rwanda. Zimwe mu ndirimbo ubu ziri kubica bigacika ni Amanota ya Danny Nanone, Nditinya ya La Reina, Avec Toi ya Marina na Ntabikunda ya Double Jay.