Ese koko umuhanuzi wo muri Malawi, Bushiri, yagendeye ku muyaga?

Umuhanuzi Bushiri w'imyaka 42 akomeje kuba igitaramo ku mbuga nkoranyambaga aho agaragara agendera ku muyaga akabyita imbaraga z'Imana ariko abamuzi bari kubitera utwatsi kubera ibyo yakoze byuzuye ibinyoma.

Ayo mashusho amugaragaza ari hafi y’inzu ye ukabona ari kugendera mu muyaga Bushiri ari kubyita imbaraga z’Uwiteka ngo ni zo zibimushoboresha.

Abazi iby’ikoranabuhanga bari kuvuga ko yaba yayahinduye bakamushyira muri mudasobwa, bakamukora agendera mu muyaga nk’uko agaragaramo.

Iyo usubije amaso inyuma usanga uyu mugabo utembere mu bihugu by'Afurika y'Amajyepfo yararanzwe n'ibikorwa by'uburiganya yitwaje ubuhanuzi.

Mu mwaka wa 2018, yagurishije amafaranga yitaga ay'ibitangaza aho yagurishaga ku muntu akamuha menshi kuri yo, we yayitaga ay'ibitangaza ngo azana ubukire.

Icyo gikorwa cyatumye afungirwa urusengero na Guverinoma ya Botswana ku bwo kwica amategeko y'imari y’icyo gihugu.

Yavuze ko kandi avura SIDA akanazura abapfuye, ibyo byose akabivuga nta gihamya.

Mu mwaka wa 2020 yahunze Afurika y'Epfo ajya kuba iwabo muri Malawi acitse ibirego byamucishaga miliyoni zirenga 6 z' Amadolari ya Leta Zunze Ubumwe y'Amerika.

Guverinoma y'Afurika y'Epfo yafatiriye imitungo ye irimo indege n'inzu. Guhera mu mwaka wa 2021, muri icyo gihugu kandi yatangiye gukurikiranwaho ibyaha 16 byo gukoresha undi imibonano mpuzabitsina ku gahato.

Muri Malawi yahakomereje ibyo kubwiriza anahinga. Yagurishaga ibigori n'umuceri ku kigero cyo hejuru avuga ko bifite umugisha, ubiriye cyangwa se ubiteye uba ubonye umugisha.

Ni umwe mu bubatse izina mu mwuga wo kubwiriza, yigaruriye imitima ya benshi. Abo muri Afurika y'Epfo baramwubaha cyane. Ni we wujuje sitade yaho yitwa "FNB Stadium" ijyamo abarenga ibihumbi 90, we yavuze ko yakiriye abarenga ibihumbi 100, yabikoze mu ntangiriro za 2020.