Ese abo mu Ishyaka ry'Intore batumiye abo mu Bihame by'Imana biyomoyeho?

Ishyaka ry'Intore rigizwe n'abahoze mu Bihame by'Imana rigiye gukora igitaramo cyaryo cya mbere cyizaba ku wa 25 Mutarama 2025, bari mu gikorwa cyo gutegura icyo gitaramo bazanatumiramo abo bahoranye.

Abakurikiye imyidagaduro yo mu Rwanda mu myaka itambutse bamenye itorero "Ibihame by'Imana" ryamenyekaniye cyane ku buhanga bwabo bwo guhamiriza no kuririmba neza indirimbo nyarwanda. Batumiwe mu bitaramo bitandukanye bakundwa n'abatari bake babyitabiriye n'ababakurikiye ku mbuga nkoranyambaga.

Mu mpeshyi ya 2024 byavuzwe ko iryo torero ritagikorana bamwe muri ryo baryiyomoyeho bajya ku ruhande. Abaryiyomoyeho bagiye gushinga iryabo bise "Ishyaka ry'Intore" basiga abandi mu Bihame by'Imana.

Abagiye mu Ishyaka ry'Intore bagizwe n'abamamariye cyane mu Bihame by'Imana barimo Umukondo Gatore, Ruti Joel na Icyogere. Aba basoje umwaka wa 2024 bateguza igitaramo cyo kumurika iryo torero bacyita "Indirirarugamba" cyizaba ku wa 25 Mutarama 2025.

Ese batumiye abo mu "Bihame by'Imana?"

Umwe mu bagize iryo torero, Icyogere yavuze ko nta mwuka mubi bafitanye bityo batumiye abo bahoranye. Ati:"Abasigaye mu Bihame by'Imana ni abavandimwe nta kibazo dufitanye, twarabatumiye ngo bazitabire baze mu gitaramo tuzakora cyo kumurika Ishyaka ry'Intore."

Yongeyeho ko batumiwe nk'abazaza kureba uko batarama batatumiwe gutarama kuko icyo gitaramo cyizaba cyihariwe n'Ishyaka ry'Intore.

Iryo torero rikomeje kugaragarizwa urukundo n'abiganjemo ibyamamare: Kate Bashabe, Butera Knowless, Clement Ishimwe, Massamba Intore na Juno Kizigenza, bakomeje kugira uruhare mu gutumira abantu kuzitabira icyo gitaramo cy'Ishyaka ry'Intore.