DRC: Abaganga bataye abarwayi barembejwe na Ebola

Iyi myigaragambyo ije mu gihe Ebola yo mu bwoko bwa Bundibugyo ikomeje gukwirakwira mu bice bitandukanye by'igihugu. Kugeza ku wa 3 Kanama 2026, Minisiteri y'Ubuzima muri RDC yatangaje ko iki cyorezo kimaze guhitana abantu 1,751, mu gihe abanduye bageze kuri 3,874.

Amakuru dukesha ikinyamakuru Actualite cyandikirwa muri iki gihugu , agaragaza ko iki cyorezo kimaze kugera mu ntara eshanu zirimo Ituri, Kivu y'Amajyaruguru, Kivu y'Amajyepfo, Haut-Uélé na Tshopo. Intara ya Ituri ni yo yugarijwe cyane, kuko abarenga 90% by'abanduye bose ari ho babarizwa.

Nubwo inzego z'ubuzima zikomeje gukurikirana abantu bakekwaho kuba barahuye n'abarwayi kugira ngo zikumire ikwirakwira ry'icyorezo, ibikorwa byo kuvura byakomwe mu nkokora n'ibura ry'abakozi nyuma y'uko bamwe bahisemo guhagarika akazi.

Kugeza ubu, abarwayi 717 bakomeje kuvurirwa mu bitaro, mu gihe 749 bamaze gukira. Inzego z'ubuzima zivuga ko umubare w'abahitanwa na Ebola ugera kuri 45.1% by'abanduye.

INDI NKURU WASOMA : Muhanga: Umuturage arataka nyuma yo gusenyerwaho ishuri n'ubuyobozi

Abashinzwe ubuzima bavuga ko uretse ikibazo cy'imishahara y'abakozi, urugamba rwo guhangana na Ebola rukomeje kugorana kubera umutekano muke mu duce twibasiwe, ibura ry'ibikoresho byo kwa muganga ndetse n'imyumvire ya bamwe mu baturage ituma ingamba zo gukumira icyorezo zitagerwaho uko bikwiye.

Ku wa 1 Kanama, ubuyobozi bw'ubuzima mu mujyi wa Beni bwatangaje ko imodoka y'imbangukiragutabara yari yoherejwe gutwara umuntu wakekwagaho Ebola yangijwe, ibintu byarushijeho kudindiza ibikorwa by'ubutabazi.

Mu gihe ikibazo cy'imishahara y'abaganga kigishakirwa umuti, Ishami ry'Umuryango w'Abibumbye ryita ku Buzima (OMS) ryatangije igeragezwa rya mbere ry'umuti ugamije kuvura Ebola yo mu bwoko bwa Bundibugyo.