Dore abakinnyi 5 batangaje ko basezeye ruhago ariko nyuma bakisubiraho

Nyuma yo gukina mu ikipe ya Juventus yo mu gihugu cy' U Butaliyani, umuzamu w'Umunyapolonye, Wojciech Szczesny yavugiye ku mugaragaro ko asezeye ibyo gukina ruhago, ariko imvune y'umuzamu wa Barcelona, Marc André Ter Stegen igiye gutuma agaruka mu izamu. Si we mukinnyi gusa w'umupira w'amaguru wisubiyeho.

Abazi ibijyanye n'umupira w'amaguru bazi ko iyo umukinnyi yageze mu myaka 30, batangira kumubarira mu bakinnyi bakuze ndetse baba begereza igihe cyo gusezera ku gukina ruhago bya kinyamwuga.

Ni muri urwo rwego abakinnyi bageze muri iyo myaka batangira gutekereza igihe cyo gusezera, hari abasezera bagasanga barahubutse bagahitamo kongera kwemera kugaruka mu kibuga.

Hari urutonde rurerure rw'abanyabugwi mu mupira w'amaguru bafashe ikemezo cyo gusoza ibyo gukina umupira w’amaguru ariko nyuma bakagaruka mu kibuga.

Igisubizo.com igiye kubakugezaho nyuma yuko umuzamu Wojciech Szczesny w'imyaka 34 wari wasezeye ruhago mu mpeshyi, yemeranyije na Barcelona kuza kuyikinira kugira ngo azibe icyuho cy'umuzamu wabo wa mbere Marc André Ter Stegen wavunikiye mu mukino wari wabahuje na Villarreal ku wa 22 Nzeri 2024.

Ukuza kwa Wojciech Szczesny muri Barcelona byamaze kwemezwa n'umuhanga mu bijyanye n'amakuru y'abakinnyi, Fabrizio Romano wavuze ko ikipe ya Barcelona yamaze kumvikana na we gusinya amasezerano y'umwaka.

Abandi bakinnyi bavuye mu kibuga

Paul Scholes

Uyu munyabigwi mu mupira w'amaguru w'Umwongereza yagarutse mu kibuga hari hashize amezi atandatu atangarije Isi ko yamaze gusezera ibyo gukina umupira w'amaguru mu mpera z' umwaka w'imikino 2011/12.

Paul Scholes yagaragaye ku ntebe y'abasimbura mu mukino wari wahuje ikipe ye ya Manchester United na Manchester City, agiye mu kibuga yahise ageza inshuro 21 yagaragaye akinira Manchester United, mbere yuko na none areka gukina umupira w’amaguru.

Ubu ni umusesenguzi w’umupira w’amaguru w’imyaka 49.

Marc Overmars

Uyu ni umwe mu bakinnyi bakiniye ikipe ya Arsenal na Barcelona. Yagaragaje cyane mu mwaka w'imikino 2006/7 birangira imvune yo mu ivi ituma areka ruhago afite imyaka 31.

Kubera gukunda umupira w'amaguru, mu mwaka wa 2008 yagarutse mu kibuga akinira 'Go Ahead Eagles' ariko nyuma ya mvune yo mu ivi ituma yongera kureka ruhago.

Ni umwe mu baholandi bakanyujijeho muri ruhago, afite imyaka 51.

Jens Lehman

Jens Lehman ni umuzamu w'umupira w'amaguru wakiniye ikipe zirimo Arsenal. Uburyo yagarutsemo busa n'ubwa Wojciech. Nyuma yo gukinira ikipe ya VfB Stuttgart yavuze ko yahagaritse gukina umupira w'amaguru, ariko nyuma yagaruwe n'ikipe ya Arsenal ayikinira umwaka umwe w'imikino.

Yamuhamagaye kubera imvune y'abazamu ba Arsenal yari ifite barimo Vito Mannone. Jens yaraje akajya yicara ku intebe hagakina umuzamu wa mbere, Manuel Almunia.

Manuel Almunia yaje kuvunikira mu mukino Arsenal yakinagamo na Blackpool, Jens ahita amusimbura.

Uyu mugabo ubu afite imyaka 54.

Johan Cruyff

Johan Cruyff ni umunyabigwi w’umupira w’amaguru ugaragara ku rutonde rw’abakinnyi batangaje ko bahagaritse gukina umupira bikarangira bagarutse.

Yakiniye ikipe ya Barcelona anakinira Ajax y’iwabo i Amstredam mu Buholandi.

Afite imyaka 31, yavuze ko ahagaritse ibijyanye no gukina umupira, nyuma aza kwisubiraho asinyira ikipe yo muri Esipanye yitwa Levante, yaretse gukina umupira bya burundu afite imyaka 37.

Ubu ni inararibonye muri ruhago ifite imyaka 68.

Umuzamu Wojciech Szczesny yisubiyeho, agiye kugaruka mu kibuga