Chris Brown yarekuwe
Umuhanzi Chris Brown wari uherutse gufatirwa mu Bwongereza ashinjwa gukubita no gukomeretsa, umucamanza agategeka ko afungwa kugeza agarutse mu rubanza, yarekuwe ku ngwate.
Umuhanzi wo muri Leta Zunze Ubumwe z'Amerika, Christopher Maurice Brown uzwi na benshi mu muziki nka Chris Brown yahawe uburenganzira bwo gusohoka mu gihome cyo mu Bwongereza yatawemo ashinjwa gukubitira mu kabari k'i London uwitwa Abe Diaw. Hanzuwe ko asohoka ku ngwate ingana na miliyoni 5 z' Ama-Pound ubundi akurikiranwe ari hanze.
Ku wa Kane tariki ya 15 Gicurasi 2025 nibwo inkuru yabaye kimomo ko icyamamare mu njyana ya R&B, Chris Brown yatawe muri yombi akurikiranyweho gukorera urugomo mu kabari kitwa “Tape” gaherereye i London. Bavuga ko yakubise icupa utunganya indirimbo witwa Abe Diaw aramukomeretsa mu ijoro ryo ku wa 19 Gashyantare 2023.
Kuri uyu wa Gatatu, umucamanza witwa Tony Baumgartner yari mu rukiko rwa Southwark Crown yanzura ko Chris Brown agomba kurekurwa ku ngwate ingana na miliyoni 5 z' Ama-Pound, akurikiranwe ari hanze. Ayo mafaranga yaciwe uyashyize mu Manyarwanda ararenga miliyari 9 (9,604,650,000 RWF).
Iryo rekurwa riratuma akomeza imyiteguro ye y'ibitaramo mpuzamahanga "Breezy Bowl XX" afitiye amatariki mu Bwongereza muri Kamena na Nyakanga 2025.
Yategetswe ko agomba gukoresha urupapuro rwe rw'inzira muri izo gahunda z' ibitaramo, akirinda kurukoresha mu bindi bikorwa.
Chris Brown yafatiwe i Manchester n'ubundi yari muri gahunda zo gutegura ibitaramo ateganya kuhakorera. Biteganyijwe ko akomeza imyiteguro yabyo.
Ikindi kandi, nk’uko yabitegetswe azongera yitabe urukiko ku wa 13 Kamena 2025.
What's Your Reaction?
