Chris Brown witegura gutaramira muri Afurika y’Epfo yahagurukiwe n’abaturage baho
Chris Brown uherutse kwerekwa urukundo n’abakunzi b’umuziki bo muri Afurika y’Epfo bakamara amatike y’igitaramo cye mu gihe gito, abababajwe n’ihohotera yakoreye igitsinagore bamuhagurukiye.
Christopher Maurice Brown wamenyekaniye muri Amerika nka Chris Brown yatangaje ko afite igitaramo muri Afurika y’Epfo, yerekwa urukundo biciye mu kumara amatike y’igitaramo ku isoko mu masaha make, ariko ihuriro ry’abagore rirwanya ihohotera rishingiye ku gitsina ryamuhagurukiye rishaka ko akomanyirizwa ntazakore icyo gitaramo kubera ihohotera yakoreye abarimo uwari umukunzi we, Rihanna.
Ku itariki ya 03 Ukwakira 2024, Chris Brown yashyize ku isoko amatike y’igitaramo azakorera mu gihugu cy’Afurika y’Epfo, ku wa 14 Ukuboza 2024, ahita ashira mu masaha abiri. Mu gihe abaguze amatike biteguye kuzataramirwa n’uwo muhanzi, icyaha yakoze mu mwaka wa 2009 cyo gukubita uwari umukunzi we, Rihanna, gikomeje kumutambamira.
Itsinda ry’abagore riharanira uburenganzira bw’igitsinagore [Woman Change] ryo muri Afurika y’Epfo ryiyemeje guhagarika icyo gitaramo cya Chris Brown kubera amateka ye mabi yagize yo gukubita uwari umukunzi we, Rihanna.
Chris Brown yakubise uwo mukobwa bari mu rukundo mu mwaka wa 2009, amashusho yagaragaye mu bitangazamakuru yagaragazaga Rihanna afite inguma mu maso bigaragara ko yababajwe cyane. Mu myaka yakurikiyeho Chris Brwon yagiye yumvikana avuga ko abantu batagakwiye gukomeza kumuryoza iryo kosa yakoze.
Igisubizo.com iherutse kubagezaho ibyo yavuze ko afite indirimbo 20 zitarasohoka, zose zisaba imbabazi Rihanna.
Uwo muryango wo muri Afurika y’Epfo ntabwo witaye kuri ibyo byose yatangaje ahubwo bashishikajwe no kumukumira mu gihugu cyabo, ngo umuntu ufite imyitwarire nk’iye ntakwiriye gutaramira mu gihugu cyabo.
Umugambi wo kumuhagarika ugeze kure kuko ubu bamaze gukusanya isinya ibihumbi 20,000 zo kumukomanyiriza ntahabwe uburenganzira bw’inzira (Viza) bwo kwinjira muri Afurika y’Epfo.
Biteganyijwe ko Chris Brown azataramira muri Afurika y’Epfo ku wa 14 na 15 Ukuboza 2024 musi sitade karundura yakira abantu ibihumbi 94, 736 izwi nka FNB (FNB Stadium), akazava muri icyo gihugu yerekeza mu gihugu cya Brazil.
Ibyo Chris Brown yakoze mu mwaka wa 2009 byo gukubita Rihanna bikomeje kumukurikirana
Itsinda riharanira uburenganzira bw'igitsinagore muri Afurika y'Epfo ryiyemeje gukumira Cris Brown muri Afurika y'Epfo
What's Your Reaction?
