Yaririmbye indirimbo itari iye! Celine Dion yataramiye mu munara wa Eiffel Tower

Umuhanzikazi Celine Dion uba mu gihugu cya Canada, yaraye atanze ibyishimo mu gutangiza imikino ya Olympics 2024, yatangiye ku mugoroba wo ku wa Gatanu, tariki ya 26 Nyakanga 2024 i Paris mu Bufaransa. Yataramiye abantu ari mu munara warutura uzwi nka Eiffel Tower.

Guhera mu mwaka wa 2020, Celine Dion yarembejwe n'indwara yitwa 'Stiff Person Syndrome ' ituma atangira kugenda biguru ntege mu gukora ibitaramo, nyuma arabihagarika arabanza arivuza. Mu minsi yashize nibwo abantu basamiye hejuru ko azatarama mu itangizwa ry'imikino ya Olympics iri kubera mu Bufaransa.

Ubwo hatangizwaga iyo mikino ku mugoroba wo ku wa Gatanu, Celine Dion ni we wasoje umuhango wo kuyitangiza, ataramira ibihumbi byari biyikurikiye.

Dion wari hejuru mu munara wa Eiffel Tower yaririmbye indirimbo yitwa 'Hymne à l'amour' y'umuhanzi Édith Piaf. Ni indirimbo yaririmbanye amarangamutima menshi, yerekana ko umutima uzakomeza gutera.

Mu cyegeranyo cyigaruka ku bihe by'uburwayi yaciyemo 'I am: Celine Dion,' hari aho cyivuga ko indwara 'Stiff Person Syndrome,' yamugejeje aho yumvise agiye kwitaba Imana. Agahamya ko ibitaramo ari umuti we, ku bw'ibyo rero, ari gukora umunsi ku wundi kugira ngo asubukure ku mugaragaro ibitaramo bye.

Yagize ati:"Ubu ntabwo bingoye gukora ibitaramo, icyingoye ni ukubihagarika. Nkumbuye abantu, nkumbuye ibitaramo. Ntinashobora kwiruka nzatambuka, ntinashobora gutambuka, nzikwega hasi ariko sinzijyera mpagarara."

Abandi banyamuziki bataramye mu itangizwa ry'imikino ya Olympics  2024 ni Lady Gaga n'Umufaransakazi ufite inkomoko muri Mali, Aya Nakamura.

Celine Dion yongeye gutaramira abakunzi b'umuziki bari bakurikiye imikino ya Olympics 2024