Bobi Wine yasubije Gen. Kainerugaba wamwise ‘ikigoryi’

Gen. Muhoozi Kainerugaba uri mu nshingano zo kuba Umugaba mukuru w'Ingabo za Uganda akaba n'umujyanama mukuru wa Perezida Museveni mu bya gisirikare, yabwiye amagambo akomeye Bobi Wine arimo kumwita 'ikigoryi' na we ahita amusubiza ko atuma arara adasinziriye bigatuma yandika ubucucu.

Uyu Mugaba Mukuru w’Ingabo za Uganda akunda kugarukwaho kubera amagambo atungurana cyane acisha ku rubuga rwa X, yakojeje ibaba muri wino ashimagiza uwitwa Mathias Mpuuga.

Ati:"Uyu mugabo asa neza akwiye kuba Perezida. Ni umunya-politike mwiza utanga ibitekerezo byubaka."

Ntiyagarukiye aho kuko yakomeje yatsa umuriro ku muhanzi akaba n'umunya-politike, Bobi Wine utavuga rumwe n'ubutegetsi bwa Museveni, abishimangira ashinga ishyaka ryitwa 'National Unity Platform.'

Yamubwiye ati:"Kabobi agerageza kwijijisha abeshya ko ari umusimbura wa Bob Marley. Mbere na mbere, Bob Marley yaririmbye indirimbo zitazibagirana! Bob Marley yari umugabo mwiza ufite amenyo ari ku murongo. Ariko amenyo ya Kabobi ntari ku murongo."

Yakomeje amwita utagira ubwenge. Ati:"Kabobi nta bwenge agira 'ni ikigoryi,' azanatsindwa mu matora azaba mu minsi iri imbere."

Bobi Wine na we yamaze guca ku rubuga rwa X agira ati:”Uvuze amenyo cyangwa nta menyo, ‘Kabobi’ atuma wowe na papa wawe murara mudasinziriye.”

“Ntibitunguranye uri gusoma ku bugoryi bwawe ukanandika ubucucu mu gicuku (nijoro). Komeza wice, reka Isi imenye uwo uri we.”

Abantu bakomeje kwibaza iherezo ry’iyo ntambara y’amagambo yakamejeje hagati ya Gen. Muhoozi Kainerugaba na Bobi Wine.

Gen. Kainerugaba yise Bobi Wine 'ikigoryi'

Bobi Wine yasubije Gen. Kainerugaba ko atuma we na papa we barara badasinziriye