Ballon d'Or 2024: Umunya-Afurika y'Epfo, Ronwen Williams yandikiyemo amateka, George Weah yongera kwigaragaza: Uko Abanyafurika bitwaye mu itangwa rya Ballon d'Or

Mu ijoro ryo ku wa Mbere, tariki ya 28 Ukwakira 2024 nibwo mu mujyi wa Paris mu Bufaransa hatangirwaga igihembo cya Ballon d'Or cyegukanwe na Rodrigo Hernandez Cascante [Rodri]. Ni igihembo kiba gikurikiwe n'ibindi bihembo byinshi birimo icy'umuzamu mwiza cyahataniwe ku nshuro ya mbere n'Umunyafurika y'Epfo, Ronwen Williams.

Ibirori byo gutanga igihembo cya Ballon d'Or byabereye mu Bufaransa mu nyubako ya Theatre du Chatelet biyoborwa n'umunyabigwi mu mupira w'amaguru wo mu gihugu cya Côte D'Ivoire, Didier Drogba. Bivuze ko ari we wasangizaga ijambo ndetse akamenya n'abagiye gutanga no kwegukana ibihembo, dore ko Ballon d'Or iba ikurikiwe n'ibindi bihembo aho bahemba umuzamu mwiza, umutoza mwiza, ikipe nziza, uwatsinze ibitego byinshi n'abandi.

Umukinnyi w'ikipe y'igihugu ya Nigeria, Ademola Lookman ukinira ikipe ya Atalanta yo mu Butaliyani, akaba ari na we mukinnyi rukumbi w'Umunya-Afurika ukina ku mugabane w'i Burayi wabashije guhatanira Ballon d'Or, yagaragaye mu itangwa rya Ballon d'Or aza ku mwanya wa 14 uvuye kuri Rodrigo (Rodri) wayegukanye.

George Weah wanditse amateka mu mupira w'amaguru mu mpera z'ikinyejana cya 20, akaba abitse agahigo yisangije ko kuba umukinnyi w'Umunya-Afurika watwaye Ballon d'Or mu mwaka wa 1995, ni we washyikirije Ballon d'Or, Rodrigo (Rodri).

Umuzamu w'ikipe y'igihugu y'Afurika y'Epfo, Ronwen Hayden Williams mu busanzwe ukinira Memolodi Sundowns F.C yanditse amateka yo kuba umuzamu wa mbere wo muri Afurika, ukinira n'ikipe y'imbere muri Afurika wabashije guhatanira igihembo cy'umuzamu mwiza (Yashin Trophy) mu itangwa rya Ballon d'Or.

Uyu musore waburanaga urwa ndanze, yatwawe icyo gihembo n'umuzamu w'ikipe y'igihugu ya Argentina, Damian Emiliano “Dibu” Martinez Romero [Emiliano Martinez] usanzwe ukinira ikipe yo mu Bwongereza ya Aston Villan. Ronwen wishimiye kuba yarashyizwe mu bahatanye akabera n’urugero rwiza abandi bazamu bo muri Afurika, yaje ku mwanya wa 9 uvuye kuri Emiliano wacyegukanye.

Ibyo wamenya kuri Ronwen Williams

Ronwen Williams yavutse ku wa 21 Mutarama 1992 avukira i Port Elizabeth muri Afurika. Afite metero imwe na sanimetero 84.

Umupira yawize akiri muto; yaciye mu ikipe y’abato ya Tottenham Hotspur yo muri shampiyona y’Abongereza [Premier League]. Izindi kipe zakomeje kumutyaza ni Shatterprufe Rovers na SuperSport United.

Iyo SuperSport United yayikinnyemo imyaka 12 kuva mu mwaka wa 2010 kugeza mu mwaka wa 2022,yahavuye aza mu ikipe ya Mamelodi Sundowns F.C.

Uyu musore w’imyaka 32 ni umuzamu wa mbere akaba na kapiteni w’ikipe y’igihugu ke cy’Afurika y’Epfo.

Ronwen Williams yishimiye kuba yabereye urugero rwiza abandi bazamu bo muri Afurika

Didier Drogba asuhuzanya na George Weah

Ademola Lookman yagaragaye mu itangwa ry'ibihembo bya Ballon d'Or aza ku mwanya wa 14

Rodri ni we wegukanye Ballon d'Or ya 2024