APR FC yahabwaga amahirwe yasezerewe muri CECAFA Kagame CUP 2025
Ikipe ya APR FC yari ihagarariye u Rwanda mu mikino ya CECAFA Kagame CUP 2025, yasezerewe muri 1/2 na Al Hilal SC yo muri Sudan, iyitsinze ibitego 3-1.
Iyi mikino iri kubera muri Tanzania ku nshuro ya kabiri yikurikanya, kuri uyu wa Gatandatu tariki 13 Nzeri 2025, hari hatahiwe umukino wa 1/2 wahuzaga APR FC na Al Hilal SC yo muri Sudan.
Ni umukino ikipe ya APR FC yaje kubanza igitego ku munota wa 30', gitsinzwe na William Mel Togui ku mupira yari ahawe na Memel Raouf Dao. Ikipe wabona ko iyobowe umukino yaje kurangiza igice cya mbere ikiyoboye n'igitego 1-0.
Igice cya kabiri, ikipe ya Al Hilal SC yihariye umukino mu buryo bugaragara cyane ko hari b'igitego yaje gutsinda gusa umusifuzi avuga bari bararariye, ku munota wa 82, yaje kubona igitego cyo kwishyura, gitsinzwe na Abdelrazig Taha.
APR FC yari yagaruye abakinnyi bayo bari bagiye mu ikipe y'igihugu
Iminota 90' isanzwe y'umukino yaje kurangira amakipe yombi aganyije igitego 1-1, gusa n'ubundi iminota 30' y'inyongera itangira Al Hilal SC iri hejuru ya APR FC, bidatinze ku munota wa 93', Ruboneka Jean Bosco akora ikosa aha umupira umuzamu Ruhamyankiko mu buryo bubi, maze ufatwa na rutahizamu wa Al Hilal SC, Sunday Damilare ahita atsinda igitego cya kabiri.
Bigeze Ku munota wa 111', APR FC yakinaga umukino usa no gucungira ku kwirukana umupira rimwe bakanugaririra rimwe, yaje gutsindwa igitego cya gatatu ku burangare bukomeye bwa Ombarenga Fitina wacenzwe bikaza kuvamo iki gitego cyatsinzwe na Ahmed Salem yari yanazengereje APR FC mu mukino wose.
Al Hilal na yo yari yagaruye abakinnyi bayo bakomeye bose bari mu mukinnyi y'ibihugu
APR FC yarangije umukino itsinzwe na Al Hilal SC ibitego 3-1, ihita isezererwa muri CECAFA Kagame CUP 2025 nyamara yarahabwaga amahirwe ko kera kabaye yakura iki gikombe hanze y'u Rwanda, ibyo mukeba wayo Rayon Sports ihora iyigambaho ko itarabikora nkayo.
What's Your Reaction?
