APR BBC yasinyishije kapiteni w'Ikipe y'Igihugu ya Basketball
Kapiteni w’ikipe y’igihugu ya Basketball y'u Rwanda, Ndizeye Ndayisaba Dieudonné uzwi nka Gaston yamaze kuba umukinnyi wa APR BBC mu gihe kingana n'umwaka umwe uri imbere.
Nyuma y'uko ikipe ya Tigers BBC mu minsi ishize byavugwaga ko yashakagaga gusinyisha Gaston gusa bakaza kugonganira ku ngingo uyu mukinnyi w'imyaka 29 yabasabaga ko igihe yazabona ikipe ikina BAL yazayijyamo, APR BBC iheruka gutwara umwanya wa gatatu muri iyi mikino yahise iba amahitamo meza cyane ko na yo yamwifuzaga.
Gaston yerekeje muri APR BBC nyuma yo guca mu makipe atandukanye arimo IPRC-Kigali yakiniye agitangira nk'uwabigize umwuga, Patriots BBC, REG na MAS Fes yo muri Morocco yaherukagamo.
Amakuru akavuga ko Gaston ashobora kuzajya ahembwa agera kuri miliyoni umunani n'ibihumbi magatandatu mu mafaranga y'u Rwanda (8,600,000 Rwf) ku kwezi.
Gaston n'umwe mu bakinnyi b'Ababanyarwanda bazwiho ubuhanga mu gutsinda amanota atatu
Uyu mukinnyi usanzwe ari na kapiteni w'ikipe y'igihugu ya Basketball, yatwaranye shampiyona y'u Rwanda na Patriots ndetse aba umukinnyi mwiza wa shampiyona mu 2019. Yari muri Patriots yakinnye BAL ya 2021, ndetse kandi yari kumwe na REG muri iyi mikino mu 2022.
Kapiteni Dieudonné Ndizeye kandi wari kumwe na Kriol Star yo muri Cape Verde mu mikino ya Road to BAL mu 2024 yayifashije kugera muri Conference z'iyi mikino muri 2025.
What's Your Reaction?
