Amerika yamwishe nyuma y'imyaka 12 yaramubuze! Amateka ya Osama Bin Laden wari umuyobozi wa Al-Qaeda

Kuri iyi tariki ya 02 Gicurasi nibwo Osama Bin Mohammed Bin Awad Bin Laden uzwi nka Osama Bin Laden yiciwe muri Afghanistan n'itsinda ry'abasirikare, Seal Team, akaba yari ku rutonde rw' ibyihebe byahigwaga bukware na Leta Zunze Ubumwe z'Amerika kubera ibitero by'iterabwoba birimo icyo ku wa 11 Nzeri 2001.

Osama Bin Laden yavutse ku wa 10 Werurwe 1957 avukira i Riyadh muri Saudi Arabia, yavukiye mu muryango w'abakomotse mu gihugu cya Yemen. Yari mu muryango w'abana barenga 50 babyawe na papa wabo wari umuherwe ufite sosiyete ikomeye mu bijyanye n’ubwubatsi.

Osama yamenyekanye cyane nk'uwashinze umutwe w'iterabwoba, Al-Qaeda ni igikorwa yakoze nyuma yo kuminuza no kuba umukozi wa Leta Zunze Ubumwe z'Amerika.

Yize mu Mujyi wa Riyadh nyuma ajya kwiga muri kaminuza, yarangije mu mwaka 1979 yizemo ibijyanye n'ubucuruzi ndetse n'imyuga. Nyuma yagiye kwiga muri Leta Zunze Ubumwe z'Amerika ahiga imyaka igera ku icumi (1979-1989), bamuhaye ubushobozi mu butasi, maze bamuha akazi mu Ishami rya Leta Zunze Ubumwe z'Amerika rishinzwe iperereza rya CIA.

Bari bamwizeyemo umukozi wabo mwiza uzatuma batsinda Leta bari bahanganye na yo y'Abasoviyeti ariko ntabwo umubano wabo wamaze kabiri kuko nyuma yaje kuba umwanzi wabo ashyira imbaraga mu mutwe w'iterabwoba wa Al-Qaeda.

Muri Kanama 1998, uwo mutwe washinjwe kugaba igitero kuri Ambasade ya Leta Zunze Ubumwe z'Amerika muri Tanzania no muri Kenya cyahitanye Abanyamerika n'abandi barakomereka. Ibyo byarakaje Amerika, mu mwaka wa 1999, Amerika yatangiye gushyira imbaraga mu kumushakisha ari umuzima cyangwa se yapfuye.

Yakomeje kwihishahisha ari na ko ashaka uburyo yayikora mu bwonko. Ku wa 11 Nzeri 2001, umutwe we wa Al-Quaeda wagabye igitero ku igorofa y'impanga ya World Trade Center yo mu Mujyi wa New York n'indi yo mu Mujyi wa Arlington izwi nka "Pentagon." Habaruwe abahitanywe na cyo barenga 3000.

Ibyo byaciye igikuba muri Amerika no ku Isi. Amerika yakajije umugambi wo kumuhiga  bashyiraho amafaranga angana na miliyoni 25 z' Amadolari y'Amerika ku muntu uzamwica akabazanira umutwe we cyangwa se uwamufata akiri muzima.

Bakomeje gutegereza uwamufata biratinda bituma bakuba kabiri ayo mafaranga agera kuri miliyoni 50.

Amakuru yakomeza kugera kuri Amerika ko uwo mucurabwenge w'uwo mutwe aba mu gihugu cyo mu Burasirazuba bwo Hagati, Afghanistan, bafata umwanzuro wo kumwihigirayo.

Ku wa 02 Gicurasi 2011 nibwo inkuru yakwirakwiye ku Isi hose ko Osama Bin Laden yishwe n'abasirikare b'Amerika bamusanze aho yaratuye mu gace ka  Abbottabad muri Afghanistan.

Ni amakuru yemejwe kandi n'uwo mutwe wa Al-Quaeda ariko uhamya ko ugomba kwihorera kuri Amerika, uhita ushyiraho abayobozi bawo bashya. Ni ibintu byahaye amakuru icyo gihugu yo gukaza ingamba z'ubwirinzi.

Nubwo yari mu bikorwa by'iterabwoba, Osama Bin Laden yari afite ikigo cy' ubucuruzi cyakoze imishinga yo gukora imyambaro, ikonabuhanga n'ibindi bikorwa by'ubucuruzi.

Amakuru agaragara kuri murandasi avuga ko Osama Bin Laden yabyaye abana barenga 20 ku bagore batandukanye.

Osama ni we wari umuyobozi w'umutwe w'iterabwoba wa Al-Qaeda