Amazina atazibagirana mu mukino wa APR FC na Rayon Sports
Kuri uyu wa Gatandatu tariki 08 Ugushyingo 2025, kuri Stade Amahoro i Remera, APR FC irakina Rayon Sports mu mukino w'ishiraniro mu mateka ya ruhago y'u Rwanda.
Muri uyu mukino uba uhanzwe amaso n'Abanyarwanda benshi ndetse n'abandi bakurikirana ruhago y'u Rwanda umunsi ku munsi, hari amazina y'abakinnnyi n'abatoza atazibagirana kuri wo.
Aya mazina arimo umunyabigwi muri ruhago y'u Rwanda, Jimmy Gatete wakiniye aya makipe yombi,akaba ari na we ufite agahigo ko gutsinda ibitego byinshi mu mukino uhuza aya makipe, dore ko buri kipe yayitsindiye ibitego bine bikaba umunani byose hamwe.
Umunyabigwi Jimmy Gatete uri imbere ku ifoto ni we watsinze ibitego byinshi mu mateka y'uyu mukino
Abakinnyi batsindiye buri kipe ibitego byinshi muri uyu mukino, barangajwe imbere na Sina Jérôme wibitseho agahigo ko kuba ari we watsindiye Rayon Sports ibitego byinshi kuko afite bitandatu mu gihe Umurundi Masudi Djuma kuri ubu usigaye ari umutoza, yatsindiye APR FC ibitego bitanu anganya na Issa Bigirimana.
Mu mateka y'uyu mukino kandi, Umunya-Uganda Davis Kasirye ni we wabashije gutsinda ibitego bitatu (Hat-trick) mu mukino umwe, mu gihe abakinnyi nka Sina Jérôme, Bokota Labama, Lionnel St Pleux, Ruhinda Farouk, Bokungu Ndjoli, Kambale Salita Gentil, Hakizimana Muhadjiri n’abandi bagiye babasha gutsinda ibitego bibiri mu mukino.
Mu mwaka w'imikino 2015-2016, Davis Kasirye yatsinze APR FC ibitego 3 muri uyu mukino aba uwa ubikoze
Umutoza Raoul Shungu ukomoka muri Repubulika Iharanira Demokarasi ya Congo, ni we watsinze imikino myinshi yahuje aba bakeba kuko mu myaka itandukanye yatoje Rayon Sports yatsinze imikino irindwi atsindwa ine, anganya itanu muri 16 yatoje ahanganye na mukeba APR FC.
What's Your Reaction?
