Album yamurikiwe ab’i Gisagara: Riderman na Bulldogg bataramiye ab’i Gisagara

Abaraperi bamaze kubaka ibigwi bihamye mu muziki nyarwanda, Riderman na Bulldogg bataramiye imbere ya Minisitiri w’Urubyiruko n’Iterambere ry’Ubuhanzi, Dr. Jean Nepo Abdallah Utumatwishima n’abiganjemo urubyiruko bari bateraniye mu nyubako y’imikino n’imyidagaduro y’Akarere ka Gisagara izwi nka ‘Gymnasium ya Gisagara’ ku mugoroba wo ku wa 12 Ukwakira 2024.

Mu mpera za Gicurasi 2024, Riderman na Bulldogg batunguye abakurikiranira hafi umuziki nyarwanda, babaha umuzingo w’indirimbo [album] ugizwe n’indirimbo esheshatu (6). Ku itariki ya 24 Kanama 2024, bakoze igitaramo cyo kuyimurika. Ni igitaramo cyabereye mu ihema rya Camp Kigali kigenda neza.

Kuri uyu wa Gatandatu, tariki ya 12 Ukwakira 2024, aba baraperi bataramiye imbere ya Minisitiri w’Urubyiruko n’Iterambere ry’Ubuhanzi, Dr. Utumatwishima wari kumwe n’abiganjemo urubyiruko bari bateraniye mu nyubako ya Gymnasium ya Gisagara iherereye mu Karere ka Gisagara mu Ntara y'Amajyepfo.

Muri abo babiri, Bulldogg wabanjirijwe ku rubyiniro na Ariel Wayz, ni we wabanje kuza ku rubyiniro ashimisha abantu biciye mu ndirimbo ze zirimo; Cinema, Puta na Nk’Umusaza.

Amaze kuririmba izo, nibwo Riderman yaje, bataramira abantu bakoresheje indirimbo zabo ziri kuri album ‘Icyumba cy’Amategeko.’

Baririmbanye zimwe mu ndirimbo ziri kuri iyo album zirimo ‘Amategeko 10,’ ‘Hip-Hop’ na ‘Bakunda Abapfu.’

Bazisoje, Bulldogg yahise asigira urubyiniro Riderman akomeza ashimisha abantu abicishije mu ndirimbo zirimo; Nta Kibazo, Karibu Nyumbani na Abo Turibo.

Yasoje abantu badashaka ko ataha kubera kuryoherwa n’inganzo ye. Nyuma ye, ababyinnyi bayobowe na Titi Brown bongeye bagaruka ku rubyiniro bashimisha abo bari bateraniye muri iyo nyubako.

Hagati aho, bateraniye aho bavuye mu muganda wihariye w’urubyiruko ku rwego rw’igihugu wabereye mu murenge wa Kibirizi mu karere ka Gisagara. Ni umuganda wo gutera ibiti, aho hatewe ibiti gakondo birimo; umugote, umuhumuro n’umwungo, birenga ibihumbi 10.

Abantu baririmbiwe indirimbo ziri kuri album 'Icyumba cy'Amategeko'

Abari bateraniye muri 'Gymnasium ya Gisagara' baryohewe n'injyana ya hip-hop ya Riderman na Bulldogg