Abanyarwandakazi bakoze amateka mu isaganwa ryegukanywe n'Umunya-Espange

Umunya-Espagne, Ostiz Taco Paula ni we wegukanye iyi Shampiyona akoresheje amasaha 2:09’:19’’ mu ntera y'ibilometero 74 basiganwagamo mu kivunge. 

Ku mwanya wa kabiri yakurikiwe n’Umutaliyani Chantal Pegolo warushijwe amasegonda 03’’, naho ku mwanya wa gatatu haza Umusuwisikazi Anja Grossmann, na we warushijwe amasegonda 03’’.

Muri iri siganwa, Umunyafurikakazi waje ku mwanya mwiza yabaye Umunya-Ethiopia wabashije kuza mu icumi ba mbere, Abanyarwandakazi babiri na bo babasha kurangiza ku nshuro ya mbere.

Uyu munya-Ethiopia, Tsige Kiros, ni we wabaye Umunyafurika uje mu icumi ba mbere, aho yaje ku mwanya wa karindwi, arushwa amasegonda 08’’n'uwa mbere.

Abanyarwandakazi babiri, Masengesho Yvonne na Uwiringiyimana Liliane muri bane bari mu bakinnyi bitabiriye iyi shampiyona mu cyiciro cy’abangavu, babashije gusoza irushanwa, ibintu bibaye bwa mbere mu mateka ya Shampiyona y’Isi y’Amagare.

Mu myaka itanu ishize, Abanyarwandakazi bitabiriye Shampiyona y’Isi y’Amagare mu cyiciro nk’iki cy’abangavu, inshuro imwe, iyabereye i Glasgow muri Scotland, aho hari hitabiriye Byukusenge Mariate na Uwera Aline bombi batabashije gusoza irushanwa.