Abanyarwanda ntibahiriwe n'isiganwa

Mu isiganwa ryari ritandukanye ni uko bari basanzwe bahatana mu gusiganwa n'ibihe, Umufaransakazi Célia Gery byarangiye ari we uryegukanye. 

Abasiganwa bari 85 baturutse mu bihugu 40, bagasiganwa mu ntera ya Kilometero 119 na Metero 300, batangiriye kuri Kigali Convention center bakazenguruka ibice bitandukanye mu Mujyi wa Kigali, bakaza gusoreza kuri KCC n'ubundi.

Mu bazengurukaga barimo Abanyarwandakazi nka Nyirarukundo Claudette, Iragena Charlotte na Mwamikazi Jamilla, bose byarangiye bavuyemo isiganwa ritararangira kubera ibibazo by'umubiri kuri bamwe ndetse no kuzengurukirwaho.

Umufaransakazi Célia Gery ni we wegukanye umudali wa zahabu 

Iri siganwa ry'abagore mu cyiciro cy'abatarengeje imyaka 23, ni ubwa mbere ryari ribaye muri Shampiyona y'Isi y'Amagare, bivuze ko mu Rwanda hazahora hibukirwa ko ari ho ryatangiriye. 

Célia Gery wegukanye umudali wa zahabu, yakoresheje amasaha 3 n'iminota 24 n'amasegonga 26, akurikirwa n'umunya-Slovekia, Viktoria Chladonova warushijwe amasegonga 2 gusa mu gihe uwa Gatatu yabaye umunya-Espagne witwa Paula Blasi Clairol wasizwe amasegonda 12.