Espoir BBC y'ubukombe muri Basketball y'u Rwanda igiye gukina icyiciro cya kabiri
Ikipe y'ubukombe muri Basketball y'u Rwanda, Espoir BBC igiye gukina icyiciro cya kabiri nyuma y'imyaka irenga 50 ibarizwa mu cyiciro cya mbere.
Iyi kipe yubatse ibigwi mu mukino wa Basketball mu Rwanda, ndetse ikaba no muyashinzwe kera kuko ari yo mu 1963, ifite ibikombe bitandatu bya shampiyona yegukanye mu 1999, 2004, 2012, 2013, 2014 na 2015.
Nyuma y'uko mu myaka itambutse yakunze kurangwamo ibibazo by'amikoro byatumye ibura umusaruro nk'uko byahoze.
Kuri ubu mu myanzuro yemejwe mu nama y'inteko rusanze isanzwe ya FERWABA, yabaye ku wa Gatandatu tariki 6 Ukuboza 2026, yemeje ko iyi kipe yambara ibara ry'icyatsi kibisi imanuka mu cyiciro cya kabiri.
Mu mwaka w'imikino ushize muri shampiyona y'icyiciro cya mbere muri Basketball, iyi kipe yasoreje ku mwanya wa 9 ari na wo wa nyuma. Amakipe ya Inspired Generation na Kaminuza ya EAUR niyo aziyongera ku yandi asanzwe akina icyiciro cya mbere.
Espoir BBC ni ikipe y'ubukombe muri Basketball y'u Rwanda .
What's Your Reaction?
