2024: Dore ibyamamare 10 byashakishijwe cyane ku rubuga rwa Google

Buri mwaka ugendana n'ibyawo, umwaka wa 2024 wakozwemo ibikorwa birimo ibya siporo. Google ivuga ko imikino ya 'Olempike' yakuruye amarangamutima ya benshi. Bongera kurazwa amajoro n' imikino ya nyuma y'igikombe cy'Uburayi. Iyo yamamariyemo abantu batumye bashakishwa cyane kuri urwo rubuga.

Igisubizo.com igiye gushingira ku bushakashatsi bwakozwe na 'google' ikugezaho ibyamamare 10 byashakishijwe cyane kuri urwo rubuga muri uyu mwaka uri kugana ku musozo wa 2024.

1. Imane Khelif

Imane Khelif w'imyaka 25 ni umukobwa ukina umukino w'iteramakofe wo mu gihugu cya Algeria wagarutsweho cyane mu mikino ya 'Olempike' yabereye i Paris mu Bufaransa. Imisusire ye n'uburyo yarwanagamo byatumye abantu bikanga ko yaba ari umusore wihinduje igitsina akaba umukobwa.

Byatumye abarimo Elon Musk bamwamaganira kure bavuga ko adakwiye gukomeza amarushanwa ariko byarangiye abaye umukobwa wegukanye igihembo cy'umukinnyi mwiza w'iteramakofe.

Yakomeje gutigisa imbuga nkoranyambaga ari nako ashakishwa n'abatari bake ngo bamenye uwo ari we.

2. Mike Tyson

Uyu mugabo w'imyaka 58 wamamaye mu mukino w'iteramakofe yongeye kugaruka arwana n'umusore Jake Paul w'imyaka 27. Yaherukaga gukina uwo mukino mu buryo bw' irushanwa mu mwaka wa 2005. Nyuma ajya mu bikorwa bitandukanye birimo gucuruza ibinyobwa. 

Umukino w'abo bombi wabaye mu ijoro ryo ku wa 15 Ugushyingo 2024 urangira Jake Paul atsinze Mike Tyson.

3. Lamine Yamal

Ni umukinnyi ukiri muto w'imyaka 17 wo mu gihugu cya Esipanye wamenyekaniye cyane mu ikipe ya FC Barcelona, itara rye ryaka cyane mu mikino ya nyuma y'igikombe cy'Uburayi cyabaye mu mpeshyi ya 2024. 

Ni umwe mu bakinnyi bafashije ikipe y'igihugu ya Esipanye kwegukana igikombe cy' Uburayi cyo mu mwaka wa 2024.

4. Simone Biles

Simone Biles w'imyaka 27 ni umugore wo muri Leta Zunze Ubumwe z'Amerika wihebeye ndetse ahirwa n'imikino ngororamubiri. Yitwaye neza mu mikino ya 'Olempike' 2024 yegukana umudali wa Zahabu, bituma bamwe bamwibazaho cyane bifashisha 'google' mu kumenya amakuru ye.

5. Jake Paul

Ni umusore w'imyaka 27 wamenyekaniye mu biganiro byo kuri YouTube aza no guhirwa no gukina imikino y'iteramakofe. Aherutse gutsinda rurangiranwa muri uwo mukino, Mike Tyson.

6. Nico Williams

Nico Williams ni umusore w'imyaka 22 akaba umukinnyi w'ikipe ya 'Athletic Bilbao' n'ikipe y'igihugu ya Esipanye. Ni umwe mu bakinnyi bigaragaje cyane mu mikino ya nyuma y'igikombe cy'Uburayi afasha n'iyo kipe gutwara icyo gikombe.

7. Hardik Pandya

Hardik Pandya w'imyaka 31 ni uwo mu gihugu cy'Ubuhinde wamamaye mu mikino ya 'cricket.' Yagarutsweho cyane kubera kwitwara neza mu mikino y'uwo mukino w'Isi.

8. Scottie Scuffer

Scuffer amaze kubaka izina mu mikino ya 'golf,' bitewe nuko yitwaye neza mu mikino y'uwo mukino yo mu mwaka wa 2022. Uko gutsinda byatumye abantu bamwibazaho banyarukira ku rubuga rwa 'google' bashakishwa amakuru ye.

9. Shashank Singh

Ni umukinnyi wo mu gihugu cy'Ubuhinde wahiriwe no gukina imikino ya 'cricket.' Yamamariye kubera ubuhanga bwe no guhatana kugeza yitwaye neza muri uwo mukino.

10. Rodri

Rodri ni umukinnyi w'ikipe yo mu gihugu cy' Ubwongereza, Manchester City n'ikipe y'igihugu ya Esipanye. Ni umwe mu bakinnyi bitwaye neza mu mwaka w'imikino wa 2023/24 bituma yegukana umupira wa Zahabu "Ballon d'Or."

Nawe muri uyu mwaka wa 2024 ufite uwo washatse kumenya amakuru ye bitewe n'uburyo yagukoze ku mutima atuma ushaka guhugukirwa n'uwo ari we.