Satani aguhambiriza umugozi wiboheye: Hindura imitekerereze, utsinde inzitizi, utere Imbere

Mu nyigisho za Gikristo, cyane cyane izishingiye kuri Satani, agaragazwa nk’umushukanyi ukoresha amayeri aho gukoresha imbaraga. Ntaboha umuntu ku ngufu; ahubwo akoresha ibyo umuntu akunda, aho afite intege nke, cyangwa irari rimurimo. Ni ho havuye iyi mvugo y’ubwenge: umugozi uguhambira si uw’undi muntu, ni uwo wowe wiboshye binyuze mu byemezo byawe, ingeso zawe, n’imyitwarire yawe.

Iri jambo riduhamagarira kwisuzuma, kumenya aho duhagaze, no gufata inshingano z’ubuzima bwacu aho guhora dushinja imbaraga zitagaragara. Ni ubutumwa bwo kutwigisha ko umwanzi akoresha ibitunyura cyangwa ibyo twirengagiza, akabigira inzira yo kudufata mpiri.

  Umugozi uguhambira utangirira mu bitekerezo byawe. Ibitekerezo bibi iyo ubyemeye, bihinduka imigambi; imigambi igahinduka ibikorwa; ibikorwa bikabyara ingeso; ingeso zigahinduka iminyururu.

  Nta muntu ubohwa atabigizemo uruhare. Nubwo ibigeragezo biza ku buzima bwacu, kubyakira no kubigumamo ni amahitamo yacu.

  Intege nke utitayeho ni zo ziba inzira y’umwanzi. Iyo umuntu atazi aho afite intege nke haba mu burakari, mu irari, mu kwikunda cyangwa mu bwibone aba asize urugi rufunguye.

  Kwiboha bitangirira ku kantu gato wirengagije. Icyaha cyangwa ikosa rito ridasabirwa imbabazi cyangwa ridadakosorwa hakiri kare, rikura rikavamo umugozi ukomeye.

  Uwemera gushukwa ntiyabura uwamushuka. Iyo umutima wifuza ibibi, uhura n’amajwi abishyigikira vuba cyane.

  Kwigobotora bitangirira ku kwemera ko wiboshye. Intambwe ya mbere yo kubohoka ni ukwemera ko ikibazo gihari kandi ko wagize uruhare mu kukirema.

  Imbaraga zo kubohoka ziruta izo kwiboha. Nk’uko umuntu ashobora kwiyangiza buhoro buhoro, ni ko ashobora no kwiyubaka buhoro buhoro abifashijwemo n’ukuri, isengesho, inama nziza, n’imyanzuro mishya.

  Umugozi wiboheye ucika iyo uhinduye icyerekezo. Guhinduka si amagambo; ni icyemezo gihindura inzira, inshuti, ibitekerezo n’ibikorwa.

  Ntugashinje satani ibyo umutima wawe wemeye. Ibi bitwigisha inshingano, si buri kigeragezo kidutsinda kiba ari imbaraga zidasanzwe, rimwe na rimwe ni uburangare bwacu.

  Umenya kwirinda mbere yo kugeragezwa aba amaze gutsinda. Ubwenge si ukurwana intambara imaze kugera ku marembo, ni ukuyikumira hakiri kare.

Iyo tuvuze rero ngo “Satani aguhambiriza umugozi wiboheye,” bishatse kuvuga ko umwanzi atubeshya atwereka ko ibyo dukora nta ngaruka bizagira. Atwereka ibyishimo by’akanya gato, ntatwereke umusaraba wabyo.

Umugozi wiboheye ushobora kuba:

·         Ingeso mbi (nk’ibiyobyabwenge, ubusinzi, ubusambanyi, uburakari bukabije)

·         Amagambo mabi ahora mu bitekerezo (kwiyanga, kwiheba, kwigira ntibindeba)

·         Gufata imyanzuro idatekerejweho

Niba ari wowe wiboshye, ushobora no kwibohora. Nta mugozi w’umwuka cyangwa w’ingeso udacika iyo umuntu ahagurukiye kuwuca.

Ubuzima bwacu ni inshingano yacu. Nubwo ibigeragezo bihari, nubwo hari imbaraga zitugerageza, amahitamo yacu ni yo atwubaka cyangwa akadusenya. Ntitugomba guhora twitwaza satani ngo abe ari we twikorezaho amakosa yose; ahubwo dukwiye kwisuzuma, tukamenya aho twiboheye, tugafata icyemezo cyo kwigobotora.

Kwibohora si urugendo rw’umunsi umwe, ni urugendo rw’ukuri, ukwemera, no guhinduka. Umugozi wiboheye ushobora gukomera, ariko umutima wiyemeje kubohoka uwurusha imbaraga.

Nusobanukirwa ibi, uzamenya ko umwanzi akoresha umuryango wasize udakinze ariko kandi uzamenya ko ufite ubushobozi bwo gufunga ayo marembo, ugahindura amateka yawe. Ubwenge nyabwo ni ukumenya aho waguye no guhaguruka, kuko uwaguye si we utsinzwe utsindwa ni uwemera kuguma hasi.

Philemon Burgin