Perezida Joe Biden yasanzwemo COVID-19

Ku mugoroba wo ku wa Gatatu, tariki ya 17 Nyakanga 2024, umunyamabanga w'Ibiro by'Umukuru w'Igihugu wa Leta Zunze Ubumwe z'Amerika (The White House), Karine Jean-Pierre yasohoye inyandiko ivuga ko Perezida Joe Biden yasanzwemo indwara ya COVID-19. Ibyo bikaba bibaye nyuma y'ikiganiro yatanze mu mujyi wa Las Vegas, byahise bituma asubika n'ikindi yarafite ahazwi nka UnidosUS, ahubwo ashyirwa mu kato.

Ibyo biro byahishuye ko Perezida Joe Biden yagaragazaga ko azahajwe n'ibicurane, guhumeka bigoranye n'inkorora.

Karine Jean-Pierre yavuze ko Perezida Joe Biden yakingiwe inkingo zibanza, ndetse ahabwa n'urukingo rwo gushimangira rw'indwara ya COVID-19, ariko bayimusanzemo.

Yagize ati:"Joe Biden yahawe inkingo zose za COVID-19, ariko yayisanzwemo. Ubu igikurikiyeho agiye kujyanwa mu kato mu gace ka Delaware. Aho ni ho azakomereza gukurikiranira inshingano ze."

Yijeje abaturage ba Leta Zunze Ubumwe z'Amerika ko ibyo biro by'Umukuru w'Igihugu bizakomeza kubamenyesha iby'ubuzima bwe (Perezida Joe Biden).

Kubera kugaragaza intege nke, abo mu ishyaka rye ry'Abademokarate bamusabye kureka ibyo gushaka kongera kwiyamamaza mu matora y'Umukuru w'Igihugu azaba mu mpera z'uyu mwaka wa 2024. Babigarutseho mu ijoro ryo ku wa 27 Kamena 2024, ubwo yagiranaga ikiganiro mpaka n'uwo bahanganye Donald Trump, maze akagaragaza ubwoba, gutegwa cyane ndetse no kwitaranya ibintu.

Icyo kiganiro mpaka cyimaze kurangira, abarimo uwayoboye Leta Zunze Ubumwe z'Amerika, Barack Obama, baramunenze bavuga ko yagize ikiganiro kibi. Nyuma y'abamunenze, Joe Biden na we yiyemereye ko yagize ijoro ribi.

People Magazine yanditse ko Perezida Joe Biden ufite myaka 81, yavuze ko azareka guhatana kuyobora Leta Zunze Ubumwe z'Amerika, igihe umuganga we azamubwira ko afite ikibazo cy'uburwayi cyatuma atayobora igihugu.

Perezida wa Leta Zunze Ubumwe z'Amerika, Joe Biden bamusanzemo indwara ya COVID-19