Joe Biden yijunditse Donald Trump wababariye umwana we

Donald John Trump yagarutse ku gikorwa cyakozwe na Perezida ucyuye igihe, Joe Biden cyo gufunguza umuhungu we, Hunter Biden, avuga ko cyigaragaza ikenewabo n'itonesha.

Uyu Donald Trump w'imyaka 78, yatorewe kuba Perezida wa 47 w'igihugu cy' igihangange, Amerika, asimbuye Joe Biden, ariko azatangira imirimo ye muri Mutarama 2025.

Donald Trump uzaba ugarutse ku butegetsi yaherukagaho mu mpera z' umwaka wa 2020, yavuze ko atemeranya n'igikorwa cyakozwe na Biden cyo kubabarira umuhungu we.

Ku Cyumweru tariki ya 01 Ukuboza 2024 nibwo Perezida Biden yatangaje ko yababariye umuhungu we, Hunter Biden wahamijwe ibyaha birimo gutunga intwaro mu buryo butemewe n'amategeko .

Amaze gukatirwa muri Nzeri uyu mwaka, abantu bizeye ko papa we, Biden azamubabarira agataha mu rugo akajya gukomeza ibikorwa bye.

Ibyo batekerezaga byakozwe ku wa 01 Ukuboza, Biden yashyize hanze itangazo rihishura ko yamaze kubabarira Hunter, yongeraho ko abandi bakurikiranweho ibyaha nk'ibye bakwiye kubabarirwa. Uko gusa nk'ubyitaza 'abandi bameze nka we bakwiye kubabarirwa' byatumye abantu batabibona kimwe. Umuhungu we yahise ahabwa imbabazi zitaziguye, ariko abandi bisaba gutegereza.

Donald Trump ni umwe mu bumvikanye bamunenga. Yagize ati:"Ni gute wababarira umuhungu wawe, ukareka abamaze imyaka myinshi mu buroko? Uko ni ugukoresha ububasha uhawe n'ubutegetsi mu nyungu zawe bwite."

"Umuhungu wawe yakoze icyasha arakatirwa abandi bakoze ibyaha nk'ibye baracyafunze. Urumva ari iki cyababayeho umaze gutangaza ko wamubabariye? Abantu bagomba gufatwa kimwe muri Amerika."

Hagati aho, muri Kamena 2024, Joe Biden akimenya ko umuhungu we akurikiranweho ibyaha birimo gutunga imbunda mu buryo butemewe n'amategeko, yavuze ko atazigera amubabarira, none byarangiye yivuguruje amuha imbabazi mbere yuko asigira inshingano Donald Trump.