Harimo gufata ku ngufu: Sobanukirwa 'Epstein Files' Elon Musk yashinje Donald Trump
Epstein Files ni umuzingo w'impapuro zigaruka cyane ku bikorwa byo gufata ku ngufu abagore n'abakobwa no kubacuruza byakozwe na Jeffrey Epstein. Urimo kandi nimero za telefone, urutonde rw' abakiriya n'abandi bavuganaga bagakora ibyaha. Uwo muzingo ntabwo urashyirwa ku mugaragaro ngo hamenyekane abandi bafatanyaga muri ibyo bikorwa.
Mu gihe hakomeje kugaragara ukutumvikana hagati ya Perezida wa Leta Zunze Ubumwe z’Amerika, Donald Trump n'umuherwe Elon Musk, uwo muherwe yashinje Donald Trump kuba mu bakoranaga bya hafi na ruharwa mu gufata abagore n'abakobwa ku ngufu no kubacuruza, Jeffery Epstein, uvugwa muri izo mpapuro "Epstein Files."
Ku wa Kane, Elon Musk yagiye ku mbuga nkoranyambaga yandika ubutumwa nyuma arabusiba ashinja Donald Trump kwijandika muri ibyo bikorwa bya Jeffrey Epstein.
Ati:"Donald Trump na we ari muri Epstein Files. Ni yo mpamvu uwo muzingo w'impapuro utarasohorwa. Ubu butumwa mububikire ibihe biri imbere. Ukuri kuzamenyekana."
Ni ibiki biri muri Epstein Files?
Mu mezi ashize, ubuyobozi bwa Donald Trump bwatangaje ko bufite gahunda yo gusohora uwo muzingo wuzuyemo impapuro zigaruka k'uwitwa Jeffrey Epstein.
Jeffrey Epstein wegeranyirijwe izo mpapuro zikamenyekana nka 'Epstein Files,' yari umuherwe ufitanye imibanire n'abayobozi mu nzego zitandukanye za Leta Zunze Ubumwe z'Amerika n'ibyamamare. Nyuma yo kurya iraha, yahamijwe ibyaha byo gufata ku ngufu abagore n'abakobwa arakatirwa ariko mu mwaka wa 2019 yapfiriye muri gereza bivugwa ko yiyahuriyemo.
Muri Nzeri 2024 ari kwiyamamariza kuyobora Leta Zunze Ubumwe z'Amerika, Perezida Donald Trump yemereye abaturage ba Leta Zunze Ubumwe z'Amerika ko azashyira hanze 'Epstein Files' wose abantu bamenye ibikubiyemo.
Hindustan Times yanditse ko Donald Trump yari inshuti magara na Epstein mu myaka ya 1990, bajyana mu birori banifotozanya, ariko nta kimenyetso cyirashyirwa hanze cyivuga ko Donald Trump yaba yarakoze ibyaha by'ihohotera rishingiye ku gitsina.
What's Your Reaction?
