Donald Trump yahishuye aho agiye guhanganira na Kamala Harris

Donald Trump watanzwe n'Ishyaka ry'Abarepubulike ngo azahatane n'uwatanzwe n'Ishyaka ryAbademokarate, Kamala Harris, yavuze ko nyuma yo kumva ko Kamala Harris ashaka ko bahurira mu kiganiro mpaka, yamaze kumvikana na Fox News, ngo bazahahanganire ku wa 04 Nzeri 2024.

Uyu Donald Trump wigeze kuyobora Leta Zunze Ubumwe z'Amerika, aza gutsindwa na Joe Biden usoje manda ye, akaba yarananiwe guhatanira indi aharira uwari umwungirije, Kamala Harris, yaciye ku rubuga rwe rwitwa 'Truth Social' ahishura ko kubera ibibazo afitanye na Televiziyo ya ABC News aherutse guhanganiraho na Joe Biden, yemeranyije n'iyitwa Fox News, ngo azahahurire na Kamala Harris, cyibere ahazwi nka 'Great Commonwealth of Pennsylvania.'

Ati:"Nyuma yuko ngiranye ibibazo na Televiziyo ya ABC, mperutse kugirirayo ikiganiro mpaka na Joe Biden, natsinzeyo agahitamo kuva mu byo guhatanira umwanya w'Umukuru w'Igihugu, agaharira Kamala Harris, nahisemo kuganira na Televiziyo ya Fox News, bari kudutegurira ikiganiro mpaka nzahuriramo na Kamala Harris ku wa Gatatu, tariki ya 04 Nzeri 2024 muri Great Commonwealth of Pennsylvania. Ni ikiganiro cyizayoborwa na Bret Baier afatanyije na Martha MacCallum."

Yasabye ko muri 'Great Commonwealth of Pennsylvania ' hazaba hari abantu bicaye mu nyubako bagikurikiye imbona nkubone.

Donald yahamije ko yiteguye guhangana n'uwasimbuye Joe Biden, Kamala Harris.

Yagize ati:"Buri muntu arabizi ko abo mu ishyaka ry'Abademokarate bahisemo umukandida ushoboye, Joe Biden, ariko namutsindiye mu kiganiro mpaka bahita bamusimbuza Kamala Harris. Niteguye guhangana na we ku wa 04 Nzeri 2024."

Byari biteganyijwe ko Donald Trump azongera agahanganira na Joe Biden kuri ABC News, ubu yamaze gusimburwa n'uwari umwungirije, Kamala Harris, ariko yavuze ko yagiranye ibibazo na ABC News ahitamo gushaka indi Televiziyo. 

Hagati aho, Kamala Harris ukomeza kuvuga ko yiteguye guhangana na Donald Trump ndetse yiyumvamo itsinzi mu matora azaba mu kwezi k'Ugushyingo 2024, ntabwo aragira icyo avuga kuri ibyo byatangajwe na Donald Trump.

Kamala Harris yamaze kwemezwa n'Ishyaka ryAbademokarate ko ari we Mukandida-Perezida uzahangana na Donald Trump

Donald Trump ariteguye guhangana na Kamala Harris