Shadow

Umunyabigwi Béchir Ben Yahmed washinze ikinyamakuru Jeune Afrique yapfuye

Umunya-Tunisia, Béchir Ben Yahmed, ufite ubwenegihugu bw’u Bufaransa washinze ikinyamakuru Jeune Afrique yapfuye kuri uyu wa Mbere tariki 3 Gicurasi 2021 afite imyaka 93 azize ingaruka za Covid-19.

Uyu musaza washinze Jeune Afrique mu 1960, yapfiriye mu Murwa Mukuru w’u Bufaransa Paris, aho yari amaze ukwezi kurenga ari mu bitaro bya Lariboisière Hospital nyuma yo kugaragaraho ubwandu bwa Covid-19.

Béchir Ben Yahmed yavutse tariki 2 Mata 1928 muri Tunisia mu kirwa cya Djerba. Mu bintu azwiho ni uko yabaye Minisitiri muri Guverinoma ya mbere ya Tunisia ikimara kubona ubwigenge nyuma yo gukolonizwa n’u Bufaransa, kandi akajya kuri uyu mwanya afite imyaka mike 28.

Nyuma y’igihe gito yahise yinjira mu itangazamakuru, aho mu 1956 yashinze ikinyamakuru cye cya mbere cyitwa L’Action cyasohokaga buri cyumweru, mu 1960 ashinga ikinyamakuru cyitwa Afrique Action cyaje guhinduka Jeune Afrique nyuma y’umwaka.

Mu 1962, Béchir Ben Yahmed wari ufite imyaka 34 gusa, yavuye muri Tunisia ajya i Roma mu Butaliyani, nyuma y’uko ikinyamakuru cye Jeune Afrique gihuye n’ikibazo cy’ubwisanzure, gusa nyuma y’imyaka ibiri yahise yimukira i Paris mu Bufaransa ariho Jeune Afrique ikibarizwa n’ubu.

Uko ibihe byagiye bihinduka hakaza iterambere, iki kinyamakuru cyagiye cyaguka mu mikorere, kiva ku kuba ikinyamakuru gisohoka mu mpapuro kinaba ikinyamakuru usanga kuri murandasi, aho ubu gifite n’ishami rya The Africa Report ryandika mu rurimi rw’icyongereza.

Jeune Afrique ni ikinyamakuru cyamamaye cyane ku Isi hose by’umwihariko ku nkuru zivuga kuri Afurika cyane ku bihugu bifitanye amateka n’u Bufaransa, ku buryo cyataziriwe akazina ko kuba igihugu cya 55 cya Afurika.

Mu mpera za 2000 uyu mukambwe witabye Imana yahaye ubuyobozi bwa Jeune Afrique abahungu be Amir na Marwane ndetse ubuyobozi bw’abanyamakuru bandika abuha François Soudan wananditse kuri Perezida Kagame ibitabo birimo icyitwa “Homme de fer”.

Béchir Ben Yahmed yari umugabo w’ibikorwa, aho mu myaka mike ishize yatangije ikinyamakuru cyo mu bwoko bwa ‘magazine’ cyitwa ‘La Revue’ kibanda ku makuru mpuzamahanga agezweho hose atari aya Afurika gusa. Gisohoka kabiri mu kwezi.

Ben Yahmed azwi nk’umwe mu banyamakuru barwanyije ubukoloni bivuye inyuma, ndetse yagiye ahura n’izindi mpirimbanyi zirimo Gabal Abdel Nasser wayoboye Misiri, Che Guevara wa Cuba, Patrice Lumumba wa RDC, ndetse yakoresheje ikiganiro Ho Chi Min wahirimbaniye ubwingenge bwa Vietnam.Apfuye asize abahungu babiri Amir Ben Yahmed na Marwan Ben Yahmed.

na Igihe

Leave a Reply

Your email address will not be published. Required fields are marked *