Shadow

Ubushobozi bucye butandukanyije Lionel Messi na FC Barcelona

Barcelona ivuga ko rutahizamu Lionel Messi atazaguma muri iyi ikipe “kubera ingorane z’amafaranga n’iz’imikorere”.

Lionel Messi leaving Barcelona after 'obstacles' thwart contract renewal | Lionel Messi | The Guardian

Messi, w’imyaka 34, kuva ku itariki ya mbere y’ukwezi kwa karindwi ni umukinnyi wigenga udafite indi kipe, nyuma yuko kontaro ye irangiye.

Ibyumweru bibiri nyuma yaho, yemeye amasezerano mashya akubiyemo kugabanyirizwa umushahara, ariko ibi byasabaga ko Barça igurisha abakinnyi kugira ngo ishobore kuriha umushahara we.

Iyi kipe yagize iti: “Impande zombi zibabajwe bikomeye nuko ibyifuzo by’umukinnyi n’ikipe mu nyuma bitazashobora kubahirizwa”.

Barcelona yari yaravuze ko Messi biteganyijwe ko yongera imyaka 21 y’umubano we n’iyi kipe asinya ayo masezerano mashya ku wa kane, yegeka ku buyobozi bwa shampiyona ya La Liga kuba ibyo bitashobotse.

Yari yagiranye amasezerano na yo yo kuyigumamo kugeza mu 2026 – ariko La Liga yavuze ko iyi kipe igomba kugabanya imishahara ye mbere yuko we n’abandi bakinnyi bashya abo ari bo bose bandikwa.

Ubuyobozi bw’iyi kipe bwagize buti: “Nubwo FC Barcelona na Lionel Messi bageze ku masezerano kandi hakaba hari hariho ubushake bugaragara ku mpande zombi bwo gusinya amasezerano mashya uyu munsi [ku wa kane], ibi ntabwo bishobora kuba kubera ingorane z’amafaranga n’iz’imikorere [amategeko ya La Liga]”.

“FC Barcelona ishimiye n’umutima wayo wose umukinnyi kubera umusanzu we mu guteza imbere ikipe kandi imwifurije ibyiza byose kuri ejo hazaza h’ubuzima bwe bwite n’ubw’umwuga”.

Messi ni we ufite umuhigo wo gutsindira Barcelona ibitego byinshi – ibitego 672, ndetse ari hamwe na yo begukanye La Liga 10, Champions League enye, n’ibikombe birindwi bya Copa del Rey.

Anafite umuhigo wo kwegukana inshuro nyinshi igihembo cya Ballon d’Or cy’umukinnyi wahize abandi ku isi mu mupira w’amaguru, yegukanye inshuro esheshatu.

Kugumana Messi muri Barcelona byari imwe mu ntego zikomeye za Perezida w’iyi kipe Joan Laporta kuri iyi mpeshyi.

Ariko ejo hazaza muri Barça h’uyu mukinnyi ufatwa ahanini nk’umwe mu ntyoza isi yagize kugeza ubu, hagowe bikomeye n’ibibazo by’amafaranga byo muri iyi kipe.

Amatora ya perezida wayo yo mu ntangiriro y’uyu mwaka, yabaye iyi kipe habura gato ngo igwe mu gihombo.

Birashoboka ko uyu mukinnyi ukomoka muri Argentina ubu ari we ushakishwa cyane mu mupira w’amaguru ku isi.

Hashize igihe bivugwa ko Messi ashobora kwerekeza muri Paris St-Germain cyangwa muri Manchester City, muri iyi kipe akaba yakongera guhura na Pep Guardiola wahoze ari umutoza we muri Barcelona.

Shampiyona yo muri Amerika ya Major League Soccer – Messi mbere yavuze ko atekereza ku kuyikinamo – na yo ni ahandi hantu ashobora kwerekeza.

Itangazo ryuko Messi agiye gukomereza ahandi risohotse hashize umwaka yoherereje Barcelona ubutumwa bwa ‘fax’ ayibwira ko yifuza gukoresha ingingo yo mu masezerano ye n’iyo kipe yashoboraga kuba yaramwemereye kuyivamo nk’umukinnyi wigenga ku mpeshyi ishize.

Hashize iminsi yohereje ubwo butumwa, yavuze ko azayigumamo, yemera ko “bidashoboka” ku ikipe iyo ari yo yose kuriha miliyoni 700 z’ama-Euro (agera kuri miliyari 835 mu mafaranga y’u Rwanda) yo mu ngingo yo kumurekura, Barça yashimangiraga ko igomba kubahirizwa.

Watch Lionel Messi Dominate Youth Competition In New Video – AmongMen

Mu mwaka wa 2000, ku myaka 13, Messi yinjiye mu ishuri rizwi cyane rya Barça ryigisha umupira w’amaguru rizwi nka La Masia, avuye mu ikipe Newell’s Old Boys y’iwabo muri Argentina.

Mu 2004, afite imyaka 16, ni bwo yakinnye umukino we wa mbere mu ikipe nkuru ya Barça.

Yaje gukinira iyi kipe imikino yose hamwe 778, ayitsindamo ibitego 672, harimo n’ibitego 120 yayitsindiye muri Champions League (ni uwa kabiri mu gutsinda byinshi muri iri rushanwa inyuma ya Cristiano Ronaldo), ndetse afite umuhigo wo gutsinda ibitego byinshi muri La Liga, ibitego 474.

Ku nshuro esheshatu, yegukanye igihembo cy’urukweto rwa zahabu rw’i Burayi (European Golden Shoe) cy’umukinnyi watsinze ibitego byinshi kurusha abandi kuri uyu mugabane.

Lionel Messi as you've never seen him before... | Eurasia Diary

BBC

Leave a Reply

Your email address will not be published. Required fields are marked *