Shadow

RIB yashyizeho impuzankano zayo

Abagenzacyaha b’Urwego rw’Igihugu rw’Ubugenzacyaha (RIB) bagiye kujya Bambara impuzankano y’uru rwego igizwe na Gilet n’ipantaro by’Umukara ndetse n’ishati y’Ubururu.

 

Iyi mpuzankano izatangira kwambarwa n’Abagenzacyaha kuri uyu wa Gatatu tariki 05 Gicurasi 2021, ifite imiterere y’impuzankano zimenyerewe ku nzego z’iperereza mu bihugu bikomeye nka FBI yo muri Leta Zunze Ubumwe za America.

Ubwo uru rwego rwa RIB rwendaga gutangira imirimo yarwo muri 2018, Minisitiri w’Ubutabera akaba n’Intumwa Nkuru ya Leta y’u Rwanda, Johnston Busingye yavuze ko imikorere yarwo izaba imeze nk’iy’uru rwego rukomeye rwa FBI.

Urwego rw’Igihugu rw’Ubugenzacyaha rurateguza Abaturarwanda ko Abagenzacyaha b’uru rwego bazajya Bambara iyi mpuzankano yagaragajwe kugira ngo biborohere kubamenya gusa ko hari n’igihe bazajya bakora batayambaye ariko bakerekana ibyangombwa byabo.

Urwego rw’Igihugu rw’Ubugenzacyaha RIB rwujuje imyaka itatu ruvutse kuko rwatangiye imirimo yarwo ku mugaragaro tariki 18 Mata 2018 ubwo rwafungurwaga ku mugaragaro na Minisitiri w’Ubutabera akaba n’Intumwa Nkuru ya Leta y’u Rwanda, Johnston Busingye.

 

Ni urwego rwavutse nyuma y’uko inshingano rufite ubu zahoze zikorwa na Polisi y’u Rwanda mu ishami ryayo rya CID (Criminal Investigation Department).

Ubwo yatangizaga ku mugaragaro uru rwego, Minisitiri Busingye yavuze ko Polisi y’u Rwanda yari imaze gukura ku buryo byari ngombwa ko ibyara urundi rwego nka ruriya.

Urwego rw’Igihugu rw’Ubugenzacyaha rufite ububasha bwisumbuye ku bwahoranywe na CID kuko kimwe mu byo rufite ububasha ari nko kuba rwafunga agace runaka kugira ngo rugakorema iperereza ku byaha byihariye nk’iterabwoba cyangwa ibindi bikomeye.

 

 

Leave a Reply

Your email address will not be published. Required fields are marked *