Shadow

Perezida Duterte yahitishijemo Abanya-Philippine “Gukingirwa cyangwa gufungwa”

Rodrigo Duterte, Perezida w’igihugu cya Philippine, yatangarije abaturage be ko uzanga kwikingiza Covid-19 azamufunga.

Duterte receives first dose of Sinopharm's COVID-19 vaccine
                               Perezida Duterte we yamaze gukingirwa

Ibi Perezida Duterte akaba yabitangaje kuwa mbere tariki 21 Kamena 2021 kuri televiziyo aho yagize  ati: “Urahitamo, urukingo cyangwa gufungwa.” Ni mu gihe iki gihugu ari kimwe mu bihugu byo muri Aziya byibasiwe cyane na Covid-19

Aya magambo ya Duterte akaba avuguruza ay’abashinzwe ubuzima, bavuze ko muri iki gihugu abantu basabwa kwikingiza ku bushake. Perezida Duterte ku ijambo rye yongeyeho ati: “Ntunyumve nabi, muri iki gihugu hari ikibazo. Ndakajwe cyane n’Abanyafilipine batumvira guverinoma.”

Kugeza ku ya 20 Kamena, muri Filipine hamaze gukingirwa abantu bagera kuri miliyoni 2.1 aho “ubuyobozi bubona ko biri kugenda buhoro” kuko bafite gahunda yo gukingira abagera muri miliyoni 70 uyu mwaka mu baturage miliyoni 110 batuye iki gihugu. Duterte ukomeje kunengwa uburyo bwe bwo guhangana na Covid-19, birimo gukomeza gutsimbarara ku cyemezo cye cyo kudafungura amashura.

Philippine iyobowe na Rodrigo Dutetre ikunze kugarukwa ho cyane kubera ibyemezo bifatwa ku ngingo runaka. Mu mwaka wa 2016, nyuma yo gutsindira kuba Perezida, Duterte yatangije “urugamba rwo guhashya ibiyobyabwenge” aho abantu ibihumbi n’ibihumbi bishwe. Imiryango iharanira uburenganzira bwa muntu yavuze ko “Abayobozi” bishe “abakekwaho ibiyobyabwenge” naho Duterte we akavuga ko “abishwe ari abarwanyaga inzego z’umutekano”.

Ibi byatumye urukiko mpuzamahanga mpanabyaha ruhamagaza Perezida Duterte nawe yanga kwitaba ngo “ntiyaburanira imbere y’abazungu” ndetse muri 2018 igihugu cye yagikuye mu bihugu bigize ICC.

 

Leave a Reply

Your email address will not be published. Required fields are marked *