Shadow

Madagascar:Ibyishimo byatumye Perezida akodesha indege ijyana abafana gushyigikira ikipe

Perezida wa Madagascar Andry Rajoelina yakodesheje indege yihariye yo kujyana abafana mu Misiri gushyigikira ikipe yabo, ikipe yageze muri 1/8 cy’imikino y’igikombe cya Afurika.

Airbus y'ubu bwoko izatwara abafana ku wa gatandatu ibasubize iwabo ku cyumweru

Byabaye ibyishimo bidasanzwe muri iki kirwa cyo mu nyanja y’Ubuhinde ubwo batsindaga ikipe ya Nigeria 2-0 bakabona itike ikomeza kandi ari ubwa mbere bagiye muri iri rushanwa.

Iyi kipe y’igihugu yitwa ‘Barea’, izina riva ku bwoko bw’inka zo muri iki gihugu, ku cyumweru izakina na Kongo Kinshasa izatsinda ibone tike ya 1/4 cy’irangiza.

Rinah Rakotomanga, umuyobozi ushinzwe itumanaho mu biro bya Perezida wa Madagascar, yabwiye ibiro ntaramakuru AFP ko nyuma yo kumva ubusabe bw’abafana b’iyi kipe Perezida yatanze indege.

Yagize ati: “Perezida Andry Rajoelina hamwe na Leta ayoboye, biyemeje gutanga indege ya Airbus 380 irimo imyanya 480, yo gutwara abafana”.

Biteganyijwe ko iyi ndege ihaguruka ku murwa mukuru Antananarivo ku wa gatandatu ikazahita isubirayo nyuma y’umukino wo ku cyumweru.

BBC/IGISUBIZO,COM

Leave a Reply

Your email address will not be published. Required fields are marked *